Jobalardyń arasynda Rýna jazýyn optical men intelligent character recognition arqyly taný jáne taldaý baǵdarlamasy bar. Jobanyń negizgi maqsaty – Kúltegin eskertkishindegi kóne túrki rýna jazýlaryn zamanaýı sıfrlyq tehnologııalar arqyly taldaý. Bul úshin optıkalyq tańbalardy taný (OCR) algorıtmi negizinde arnaıy model qurylǵan.
«Algorıtmdi qurastyrý úshin biz aldymen rýna alfavıtiniń kitaphanasyn jasaqtadyq. Bul – barlyq tańbalar men olardyń nusqalaryn qamtıtyn baza. Keıin eskertkishten túsirilgen sýret nemese PDF faıl engizip, júıeni oqyttyq. Osylaısha júıe tańbalardyń jalpy sanyn, jıiligin jáne taralýyn eseptep beredi. Osy arqyly mátin qurylymyn statıstıkalyq turǵydan taldaýǵa bolady», deıdi joba avtorlary.
Jobanyń ǵylymı jetekshisi Kúlshat Aqanova algorıtmdi jetildirý úshin jasandy ıntellekt pen neırojeliler qoldanylǵanyn aıtty. Mashınalyq oqytý ádisteri arqyly júıe rýna jazýyn tanyp úırengen.
«Bul júıeni tek rýna jazýyn oqýda emes, basqa da salalarda qoldanýǵa bolady. Máselen, avtokóliktiń memlekettik nómirin taný júıesinde, ýnıversıtetke kirerdegi Face ID sekildi bıometrııalyq baqylaýda, vıdeobaqylaý kezinde aýdıtorııadaǵy adam sanyn anyqtaý jáne jynysyna qaraı jikteý, qoǵamdyq qaýipsizdikti baqylaý, ıntellektýaldy júıeler qurý sekildi baǵyttarda paıdalana berýge bolady. Tek algorıtmdi oqytsa, bolǵany», deıdi K. Aqanova.
Kórmede budan ózge de túrli jasandy ıntellekt negizinde jasalǵan jobalar tanystyryldy.
Dáris oqıtyn JI-avatar - onlaın oqytýdyń múmkindikterin keńeıtetin ınnovasııalyq qural.
Eýrazııa ulttyq ýnıversıtetiniń ǵalymdary onlaın oqytýdaǵy basty máseleniń birin sheshý maqsatynda jasaǵan. Qazirgi kezde stýdentterdiń ekran aldyndaǵy nazaryn uzaq ýaqyt boıy ustap turý – onlaın bilim berýdegi úlken qıyndyqtardyń biri. Dástúrli beınematerıaldarda emosııa men shynaıy áserdiń jetispeýi stýdentterdiń qyzyǵýshylyǵyn tómendetedi.
JI-Avatardyń ereksheligi – ol tek mátindi oqyp qana qoımaı, emosııamen jetkizedi, qazaq tiliniń sıntaksıstik erekshelikterine saı ym-ıshara men mımıkany beıneleıdi. Bul stýdentke shynaıy ustazben sóılesip otyrǵandaı áser qaldyrady. Bul tehnologııa onlaın kýrstardy, mýltımedıalyq oqý baǵdarlamalaryn daıyndaýda tıimdi qural bola alady. Tipti keı jaǵdaıda ol muǵalimdi tolyq almastyryp, oqý barysyn avtomattandyrýǵa múmkindik beredi.
