Eńbek jolyn 2007 jyly Ekibastuzdaǵy mektepte bastaǵan Qýanysh Altynjanov 2011 jyly Sıngapýrdaǵy «Problem based learning» dep atalatyn kýrsqa qatysqan. Bir jyldan soń aǵylshyn tilin shyńdaý maqsatynda Soltústik Irlandııanyń Belfast qalasyndaǵy tildik kýrsqa barǵan. Al 2013 jyly «Bolashaq» baǵdarlamasymen Fınlıandııadaǵy HAMK ýnıversıtetinde joǵary synyptarda matematıkany aǵylshyn tilinde oqytý boıynsha pedagogıkalyq taǵylymdamadan ótken. Sol jaqtaǵy mektepterdiń tájirıbesin kórip, ǵylymı jobasyn qorǵaǵan soń Q.Altynjanov 2021 jyly óziniń týǵan aýylyndaǵy mektepke oralyp, «matematıka muǵalimi» atanady.
– Ár bala qaı jerde týyp-óskenine qaramastan, sapaly bilim alýǵa tıis. Meniń de maqsatym sol, aýyl oqýshylaryna shetelden alǵan bilimim men tájirıbemdi bólisip, olardy básekege qabiletti tulǵa etip qalyptastyrǵym keledi. Jalpy, shákirt jetistigi – muǵalim jetistigi ǵoı. Birde oqýshym halyqaralyq saıystan júldeli oralyp, maǵan erekshe alǵysyn aıtyp, «Men bolashaqta matematıka muǵalimi bolamyn, oǵan búgin kózim jetti. Myqtylardyń qatarynan kóringenim – sizdiń eńbegińiz» degen kezde bir kúlip, bir jylaǵanymyz bar edi. Keıin sol oqýshym Ulttyq biryńǵaı testileýden 50/50 ball alyp, ýnıversıtetin de sátti aıaqtady. Qazir «Bolashaq» baǵdarlamasymen magıstratýrasyn jalǵastyryp jatyr. Minekı, bizdi qýantyp, marqaıtatyn – shákirtterdiń osyndaı jetistigi ǵoı, – dedi ol aǵynan jarylyp.
Qýanysh Altynjanovtyń sózinen onyń kásibı ustanymdary men ustazdyq jolǵa degen adaldyǵy aıqyn ańǵarylady. Sheteldik tájirıbe men zamanaýı bilim berý ádisterin meńgergen bilikti mamannyń eńbegi aýyl mektepteriniń damýyna ǵana emes, eldiń jalpy bilim berý júıesiniń ilgerileýine de úles qosatyny anyq.
– Oqýshymen til tabysyp, ony túsine bilý – muǵalimniń basty mindeti. Sabaq barysynda bir bala: «Aǵaı, keshe TikTok-ta bir vıdeo kórdim» dese, birden «Ony nege kóresiń, ol zııan» dep tyıyp tastaý durys emes. Kerisinshe, qandaı beınejazba ekenin surap, qajet bolsa, durys baǵyt-baǵdar kórsetken jón. Sondaı-aq úlgerimi tómen oqýshyny jaqsy oqıtyndarmen birge otyrǵyzýǵa tyrysamyn. О́ıtkeni balanyń yntasy da, bilimge degen qyzyǵýshylyǵy da kóp jaǵdaıda óz ortasyna baılanysty qalyptasady, – deıdi ol.
Matematıka muǵaliminiń aıtýynsha, aýyl mektepteriniń máselesi de joq emes.
– Shetelden alǵan bilimimdi qoldan kelgenshe oqý úderisinde uıymdastyryp jatyrmyn. Alaıda materıaldyq bazanyń tómendiginen kóp ıdeıalardy iske asyrý múmkin bolmaı tur. Kabınetterimiz jańa úlgidegi qural jabdyqtarymen qamtamasyz etilse, onda oqýshylardyń bilimi shyńdalatyny anyq. Áli kúnge deıin bor taqtamen jumys isteıtin mektepter bar. Shyny kerek, 5 jyl buryn alynǵan quraldardyń sapasy syn kótermeıdi. Suranys bersek, kóp jaǵdaıda «bıýdjette qarajat joq» degen jaýapqa tirelemiz. Jasandy ıntellekt damyǵan zamanda bul aýyl balalarynyń bilimge degen qushtarlyǵyn tunshyqtyryp otyr desek te bolady. Alaıda muǵalimnen suranys óte joǵary. Mınıstrlik aýyl mektepteriniń naqty problemalaryn sheshetin ýaqyt jetti. Rotasııadan bastap, muǵalimderdiń biliktiligin arttyrý isine aıryqsha mán berilýi qajet, – deıdi Q.Altynjanov.
Iá, aýyl mektebiniń múmkindigi tolyq ashylsa, bilimdi balalardyń kóptep shyǵatyny anyq. Qaı óńirde qyzmet etse de, ustazdyń basty maqsaty – shákirtke sapaly bilim berý. Shetelde jınaǵan tájirıbesin týǵan aýylyna arnap, jas urpaqqa baǵyt-baǵdar berip otyrǵan Q.Altynjanovtyń eńbegi– elge qyzmet etýdiń, urpaqqa úlgi bolýdyń jarqyn kórinisi dep bilemiz.
