Joba «Atameken» UKP men Japonııa halyqaralyq yntymaqtastyq agenttiginiń (JICA) qoldaýymen júzege asyp keledi. Bul bastama aýyl kásipkerlerin jergilikti resýrstardy paıdalana otyryp, sapaly ári básekege qabiletti ónim óndirýge yntalandyrady.
JICA-men áriptestik nátıjesinde qazaqstandyq óndirýshiler halyqaralyq kórmelerge qatysyp, óz ónimderin álemge tanytyp júr. Máselen, FOODEX Japan kórmesinde qazaqstandyq «Jantaq» baly álemniń úzdik úsh ónimi qataryna engen bolatyn.
Ashylý rásiminde sóz alǵan Gúlııa Batyrhanqyzy, «Atameken» UKP Jumyspen qamtý jáne shaǵyn, áıelder kásipkerligin damytý departamentiniń basqarýshy dırektory, jobanyń óńirlik kásipkerlikti jáne halyqaralyq áriptestikti nyǵaıtýdaǵy mańyzdylyǵyn atap ótti:
«Búgingi shara – tek jańa saýda ornynyń ashylýy emes, sonymen birge óńirlik yntymaqtastyqtyń kórinisi. Bul alańda Ortalyq Azııa elderiniń óndirýshileri bas qosyp, óz ónimderin usynýda. Aldaǵy ýaqytta JICA seriktestigimen osyndaı jobalardy keńeıtý josparda bar», – dedi ol.
JICA OVOP (BABО́) halyqaralyq jobasynyń seriktesi Kendzı Nakamýra da bul bastamanyń aımaq úshin úlken múmkindik ekenin aıtty: «Qazaqstanda alǵashqy turaqty BABО́ alańynyń ashylýy – mańyzdy qadam. Bul joba jergilikti qaýymdastyqtardyń damýyna, jańa jumys oryndarynyń qurylýyna jáne óńirlik ónimderdiń halyqaralyq naryqqa shyǵýyna jol ashady», – dedi Nakamýra myrza.
Nomad Bazaar búginde Qazaqstan men Ortalyq Azııanyń túkpir-túkpirinen kelgen óndirýshiler men qolónershilerdiń ónimderin bir shańyraq astynda biriktirip otyr. Joba aldaǵy ýaqytta da keńeıip, jańa seriktestikter men múmkindikterge jol ashýdy maqsat etedi.
