Búginde ortalyqta 100 bala bolsa, olardyń 13-i mektepke deıingi jasta, 87-si mektep oqýshylary.
Buǵan deıin de Memleket basshysynyń pármenimen ortalyq ǵımaraty tolyq jóndeýden ótetini habarlanǵan edi. «Integra» JShS áleýmettik jaýapkershilik aıasynda jóndeý jumystaryn óz esebinen júrgizýge mindetteme alyp, balalar kóshken soń qurylys-montaj jumystaryna dereý kirisýge daıyn ekenin málimdegen bolatyn.
Almaty qalalyq Bilim basqarmasynyń basshysy Saıran Saıfedenovtiń aıtýynsha, tárbıelenýshilerdi ornalastyrý máselesi erekshe baqylaýda tur.
«Qazirgi tańda jóndeý jumystarynyń jobalyq-smetalyq qujattamasy ázirlenip, negizgi ǵımaratty qaıta jańartý jáne eski sharýashylyq qurylystaryn ishinara buzý qarastyrylǵan. Sondaı-aq jańa ákimshilik korpýs salý josparlanǵan», - deıdi ol.
Saıran Saıfedenov ýaqytsha kóshirý máselesi sheshilgenin aıta kele: "Balalar ýaqytsha ornalasqan №1 arnaıy mektep-ınternaty da Bilim basqarmasynyń qaramaǵynda. Eki apta buryn munda «Januıa» mamandandyrylǵan úıiniń 90-nan astam tárbıelenýshisi turǵan bolatyn. Balalardyń ıeliginde 1100 sharshy metrden astam aýmaq bar - bul 18 bólme, onda aǵymdaǵy jóndeý júrgizilgen. Apta sońyna qaraı ǵımarat tolyq bosatylǵannan keıin merdiger uıym qaıta jańǵyrtý jumysyna kirisedi", dedi.
Erekshe áleýmettik qyzmetterge muqtaj balalarǵa arnalǵan №2 qoldaý kórsetý ortalyǵynyń dırektory Juldyz Meńlibekova: "1962 jyly salynǵan ǵımaratymyz qaıta jóndeýden ótkizý úshin ýaqytsha jabylǵandyqtan, qazir biz Toraıǵyrov kóshesindegi ǵımaratqa kóshtik. Balalar rıza, bólmeler keń, jaryq, barlyq jaǵdaı jasalǵan. Bizge osyndaı jaqsy ǵımarat usynǵany úshin Bilim basqarmasyna jáne Almaty ákimdigine alǵys bildiremiz», deıdi.
Búginde Almatyda erekshe bilim berý qajettiligi bar balalarǵa arnalǵan segiz arnaıy mektep-ınternat jumys isteıdi, onda 2 668 oqýshy bilim alady. Onyń ishinde 1 794 bala ınternatta turady, al 874-i úıde oqıdy. Budan bólek, ómirinde qıyndyq bolyp jatqan kámeletke tolmaǵandarǵa kómek kórsetetin tórt uıym bar. Bul mekemelerde 446 bala tárbıelenip jatyr.
Oǵan qosa bıyl 20 qyrkúıekte Almatyda qurylys kompanııalarynyń biri 6 mlrd teńge qarajat bólgen jańa «Januıa» mamandandyrylǵan kesheni ashylǵan edi.
