Oqýshynyń qylqalamynan shyqqan sýretterin alǵash ret Ulytaý aýdanynyń Bolatsaı baýraıynda ótken «Kókmaısa» festıvalinde kórdik. Alańda tigilgen kıiz úılerde qolóner, kıiz basý, shı toqý, arqan esý, qamshy órý sııaqty sheberlik synyby usynyldy. Qolóner týyndysyn qyzyqtap turǵanda súıekter men tastarǵa salǵan ǵajaıyp sýretter, ásirese maldyń jaýyryn súıegine salǵan sýreti kózdiń jaýyn alady.
Sýret álemin súıetin Janmıra kóp sóıleı qoımaıdy, esesine sýretteri sóıleıdi. Ol 11-synypty aıaqtaǵan soń dızaıner oqýyna barǵysy keletinin aıtty.
Daryn ıesi sýret salatyn tasty alystan izdemeıdi. Ulytaýdyń tastaryn tańdap alyp, soǵan óziniń ádemi qııalyn órnekteıdi. Tastyń betine kıiktiń, tazynyń, aqqýdyń, arqardyń jáne taǵy basqa janýarlar men qustardyń sýretin, qazaqtyń oıý-órnekterin salyp, túrli-tústi boıaýmen áshekeıleıdi. Tipti keıbir janýardyń múıizderine deıin órnek salady. Judyryqqa ǵana syıatyn jumyr tastyń ústine búkil qazaqtyń baıtaq dalasyn syıǵyzyp jibergen sheberligine tánti bolasyń.
О́nerli órenniń tarıhtan da habary bar. Kólemdileý jalpaq tastyń betine Joshy hannyń joryǵyn beınelegen. Asyqtardyń da betine tarıh qoınaýynan kele jatqan balbal tastardy bederlep salǵan. Ulytaýdyń tabıǵatyn beınelep, «Ulytaý» dep jazylǵan tósbelgiler jasaıdy.
Janmıranyń darynyn alǵash ustazy Balqııa Turysbekova baıqaǵan. Ol – Sátbaev qalasyndaǵy №7 jalpy bilim beretin mektepte kórkem eńbek pániniń muǵalimi. Sátbaev qalasyndaǵy Kenshiler saraıy janyndaǵy úıirmede oqýshylardy qolónerge baýlıdy.
«Men Janmıraǵa 5-synypta sýret páninen sabaq berdim. Sol kezde onyń qoıyn kitapshaǵa sýret salyp otyrǵanyn baıqadym. Jeke tapsyrmalar júktep kórip edim, qulpyrtyp jiberedi eken. Súıekterge sýret salarda «shıkizatyn» daıyndap beremin. Maldyń jaýyryn súıegine sýret salarda tuzǵa uzaq qaınatyp, ishindegi maıynan, ıis-qońysynan tazartyp, ábden keptiremin», deıdi ustazy.
Janmıranyń jaýyrynǵa salǵan sýretine súısinip uzaq qaradyq. Onda aspan tústes boıaýdyń joǵary jaǵynda kún shýaǵyn shashyp tur. Ortasyna qaraı qazaq halqy qasıetti qus dep sanaıtyn úkini salǵan. Qyraǵy qustyń mańdaı tusyna shaǵyn asyl tas taǵylǵan. Týǵan jerimdi, elimdi til-kózden saqtasyn degen belgi. Moıyn tusynda temirden jasalǵan ulttyq oıý-órnek. Tómengi jaǵynda tastar, aýzyn apandaı ashqan arlan beınelengen. Bul – bir ǵana týyndysy. Osyndaı qanshama qyzyqty, maǵynasy tereń týyndysy bar. Kórgen jurt tańdanysyn jasyrmaı, satyp ta alady.
Ulytaý oblysy
