Kezdesý barysynda qala boıynsha júzege asyp jatqan jobalardyń oryndalý barysy talqylandy. Búginde Almatyda 147 joba iske asyrylyp jatsa, 26 nysanda merzim mejesi saqtalmaǵan, sapaǵa qatysty talaptarda kemshilik bar.
Almatynyń Qala qurylysyn baqylaý basqarmasynyń basshysy Oljas Tólebaev monıtorıng nátıjesinde kelisimshart merzimi únemi buzylyp, qurylys normalaryn saqtamaıtyn toǵyz merdiger anyqtalǵanyn atady. Olardyń jumysynda jobadan aýytqý, uıymdastyrý deńgeıiniń tómendigi men qujat júrgizýdegi salǵyrttyq jıi baıqalady.
Qala ákimi Darhan Satybaldy mundaı nemquraılylyq qala turǵyndarynyń narazylyǵyn týdyryp otyrǵanyn jetkizdi. Kópshilik mektep pen balabaqsha qurylysynyń sozbalańǵa salynyp, saıabaqtar men jaǵalaýlardy abattandyrý jumystarynyń keshigýine, sondaı-aq jol men trotýardaǵy qazylǵan jerlerdiń ýaqtyly qalpyna keltirilmeıtinine narazylyq bildirgen.
«Odan bólek, keıbir kompanııalar bir nysandy bitirmeı jatyp, jańasyn qolǵa alatyn keleńsiz ádet qalyptastyrǵan. Mundaı tájirıbege múlde jol berýge bolmaıdy. О́ıtkeni másele adamdardyń qaýipsizdigi men jaılylyǵy týraly bolyp otyr. Eger merdiger mindetin tıisti deńgeıde oryndamasa, onyń qala jobalarynda jumys istemeýi kerek», dedi Darhan Satybaldy.
Keńes otyrysynyń sońynda qala ákimi Qala qurylysyn baqylaý basqarmasyna mundaı nysandy ár apta saıyn qadaǵalap otyrýdy, jaýapsyz merdigerlerdi lısenzııasynan aıyryp, qajet bolsa materıaldardy quqyq qorǵaý organdaryna jiberýdi tapsyrdy.
