Foto: Úkimettiń baspasóz qyzmeti
Aıta keteıik, Qazaqstandyq Alem LLM tildik modeli negizinde qurylǵan bul neırondyq jeli buǵan deıin Digital Bridge 2025 halyqaralyq forýmy aıasynda Memleket basshysyna tanystyrylǵan bolatyn.
Otyrysta qordyń 2025 jyldyń alǵashqy toǵyz aıyndaǵy qyzmetiniń qorytyndylary qaraldy. Prezıdent tapsyrmalarynyń oryndalý barysyna, ásirese iri ınfraqurylymdyq jobalardyń júzege asyrylýyna erekshe nazar aýdaryldy.
Qordyń esebi boıynsha, bıyl Jambyl oblysynda jel energııasyna arnalǵan komponentter shyǵaratyn zaýyt iske qosylyp, Jańaózende qýaty 50 megavatt kún elektr stansasy paıdalanýǵa berildi. Sondaı-aq Qosshy qalasyna gaz jetkizýge arnalǵan alǵashqy keshen ashylyp, «Dostyq – Moıynty» temirjol ýchaskesindegi ekinshi jol paıdalanýǵa berildi. Buǵan qosa, uzyndyǵy 302 shaqyrym bolatyn «Taldyqorǵan – Úsharal» magıstraldy gaz qubyry iske qosyldy. Bul jobalar eldiń kólik, energetıka jáne sıfrlandyrý salalaryndaǵy áleýetin arttyrýǵa baǵyttalǵan.
Qor basqarma tóraǵasy Nurlan Jaqypov qarjylyq jáne óndiristik kórsetkishterdiń turaqty oń dınamıkada ekenin atap ótti. Iri ınvestısııalyq jobalar boıynsha qarajatty ıgerý deńgeıi 99 paıyzǵa jetken.
Premer-mınıstr keńes músheleriniń nazaryn otandyq taýar óndirýshilerdi qoldaý máselesine aýdardy. Sıfrlyq keńesshi SKAI usynǵan derekterge sáıkes, bıyl qazaqstandyq óndirýshilerden satyp alynǵan taýar kólemi ótken jylmen salystyrǵanda 75 paıyzǵa ósip, 721 mıllıard teńgege jetken. Barlyǵy 497 otandyq kásiporynmen 7 227 kelisimshart jasalǵan. SKAI-dyń baǵalaýy boıynsha, bıylǵy satyp alý jospary Wabtec kompanııasyna tıesili jergilikti óndirýshiden lokomotıvter alý arqyly aıtarlyqtaı asyra oryndalady.
Keńes barysynda «Taza Qazaqstan» ekologııalyq bastamasynyń júzege asyrylýy da talqylandy. Bul joba aıasynda qor kompanııalarynyń qyzmetkerleri shamamen 1 mıllıon aǵash otyrǵyzýdy josparlap otyr. Sonymen qatar, ınklıýzııa, sport jáne medısına baǵyttaryndaǵy áleýmettik jobalar da qarastyryldy. Qazirgi tańda 87 nysanda 700 myńnan astam azamatqa áleýmettik qyzmet kórsetilýde, al jyl sońyna deıin Mańǵystaý men Batys Qazaqstan oblystarynda jańa sport keshenderi ashylady.
Jıyn qorytyndysy boıynsha qor basshylyǵyna ınfraqurylymdyq jobalardy ýaqytyly aıaqtaý jáne otandyq óndirýshilerdi qoldaýdy kúsheıtý tapsyryldy. Sondaı-aq taýarlar men qyzmetterdi satyp alýda qazaqstandyq qamtý úlesin ulǵaıtý mindeti qoıyldy.
