«Aspan Fest – 2025» halyqaralyq drondar jarysy elimizde bıyl úshinshi márte ótip jatyr. Osyndaı alǵashqy jarys 2023 jyly Oral qalasynda uıymdastyrylǵan bolatyn. Qazir elimizdiń barlyq óńirine tarap, mektep baǵdarlamalaryna da engizile bastaǵan FPV drondar saıysy halyqaralyq deńgeıge shyqty deýge bolady. О́ıtkeni osy sońǵy jarysqa qatysýǵa 10 memleketten komanda nıet bildirip, 80-ge jýyq pılot qatysqan eken.
«Jarys óte tartysty ótti. Byltyrǵymen salystyrǵanda saıysqa qatysýshylar sany da ósti, al dron ushyrý sapasy óte joǵary deńgeıde boldy», deıdi batysqazaqstandyq komanda jetekshisi Aıbek Mırǵalıev. Aıta keteıik, Aıbek Islamǵalıuly – oblystyq balalar tehnıkalyq shyǵarmashylyǵy ortalyǵynyń qosymsha bilim berý pedagogy, «Avıaúlgileý» úıirmesiniń jetekshisi.
Almatyda oqýshylar mıkrodrondar kategorııasy boıynsha da, úlken drondar boıynsha da synǵa túsken. Ásirese jyldamdyǵy 100-200 km/saǵat jyldamdyqpen ushyp, kedergiler arasynan ótetin besdıýımdik drondar saıysy óte tartysty bolǵan eken. Jarystar álemdik MultiGP úlken lıgalar erejesimen ótken. Elimizde tuńǵysh ret uıymdastyrylǵan avıamodeldeý jarysynda komandalar kádimgi áýe urysyna qatysypty.
«Bizdiń komanda «Fýtbol dron» saıysynda birinshi oryndy jeńip aldy. Mıkrodron jarysynda Oral qalasyndaǵy №28 mektep-lıseıde oqıtyn shákirtimiz Álıhan Nysanbaev birinshi orynǵa shyqty. Osy Álıhan Báıterek aýdany Baıqonys aýylyndaǵy Qadyr Myrza Áli atyndaǵy mektep oqýshysy Meńdibek Temirhanovpen birge «Áýe urysyna» qatysyp, ekinshi orynǵa ıe boldy. Besdıýımdik dron jarysynda da Álıhan Nysanbaev ekinshi orynǵa turaqtady. Osyndaı nátıjelerimizdiń arqasynda álemdegi eń myqty chempıonatqa – Shanhaı qalasynda ótetin dúnıejúzilik áýe sporty federasııasy (FAI) uıymdastyrǵan halyqaralyq jarysqa joldama aldyq», deıdi Aıbek Islamǵalıuly.
FPV dron, avıamodeldeý – búginde álem nazaryn erekshe aýdaryp otyrǵan salanyń biri. Ásirese bul salaǵa jas jetkinshekterdi qyzyqtyrý, oqýshylardy tartýdyń keleshegi zor. Qazir Batys Qazaqstan oblysynda júzdegen bala osy saladaǵy úıirmelerge qatysyp júr. Sonyń ishinde qaladan tys aýyl-aýdandarda da osy salany damytyp, balalardy tehnıkalyq mamandyqtarǵa tartyp júrgen bastamashyl ustazdar kóbeıip keledi.
