Foto: ratel.kz
Jıynǵa zapastaǵy polkovnık, «Qazaqstan Qarýly Kúshteri ardagerleri» respýblıkalyq qoǵamdyq birlestiginiń ókili Ǵanı Artyqov pen bloger ári jattyqtyrýshy Aıtym Jaqypov qatysty. Olar jastardy áskerge jaýapkershilikpen qaraýǵa shaqyrdy.
Aıtym Jaqypovtyń aıtýynsha, ásker – ár jigit ótýi tıis ómir mektebi. Ol jastarǵa bul kezeńge sanaly túrde daıyndalý qajettigin eskertti, ásirese fızıkalyq daıyndyqtyń mańyzdylyǵyna toqtaldy.
«Elimizde daıyndalýǵa barlyq múmkindik bar: fıtnes ortalyqtar, sport keshenderi, klýbtar jumys isteıdi. Eń bastysy – shaqyrý qaǵazyn kútpeı, sportpen shuǵyldanýdy erterek bastaý kerek. Fızıkalyq forma – jeke densaýlyqpen qatar, el qaýipsizdigine qosqan úles. Barlyq bolashaq sarbazdarǵa jattyǵýǵa kirisip, áskerge daıyn bolýǵa keńes beremin. Meniń jobama qatysqan jastardyń 90%-y ómirin túbegeıli ózgertti. Kópshiligi marafonshy, jattyqtyrýshy, tálimger atandy. Keıbiri 50-200 kelige deıin salmaq tastady. Bul tek syrtqy ózgeris emes, minezdiń qalyptasýy. Mundaı adamdar shyn máninde tártipti jáne fızıkalyq turǵydan daıyn. Al bul áskerge qajetti basty qasıet. Qazirgi bir orynda uzaq otyrý ómir salty jas býynnyń dene belsendiligin tómendetip, zat almasýǵa, jalpy densaýlyqqa keri áserin tıgizip otyr. Armııa osynyń ornyn toltyryp, negizgi daǵdylardy qaıta qalyptastyrýǵa múmkindik beredi. Ásker – bul abyroı úshin emes, Otan aldyndaǵy borysh. Eger sarbaz ózin jaqsy qyrynan kórsetse, ol joǵary oqý ornynda bilimin jalǵastyryp, kásibı jolyn Qorǵanys mınıstrligimen birge josparlaı alady. Bul – áleýmettik lıft», deıdi ol.
Al Ǵanı Artyqovtyń aıtýynsha, qazir elordada shaqyrý naýqanynyń belsendi kezeńi ótip jatyr. Ol úshin azamattar aldymen medısınalyq komıssııadan ótedi. Onda olardyń densaýlyǵy jiti tekseriledi. Tek tolyq jaramdy dep tanylǵandar ǵana ásker túrlerine jiberiledi.
«Máselen, desanttyq-shabýyl jáne arnaıy bólimderge boıy 170 sm-den joǵary, densaýlyǵy men sporttyq daıyndyǵy myqty jigitter irikteledi. Jaqsy júzetinder – Áskerı-teńiz kúshterine qabyldanady. Joǵary bilimi bar matematıkter men IT-mamandar áýe shabýylyna qarsy qorǵanys bólimderinde jumys istep, zenıttik júıeler men radarlardy basqarady. Baǵdarlamashylar men ınjenerler ǵylymı bólimshelerge bólinip, baǵdarlamalyq qamtamasyz etý men aqparattyq júıelerdi damytady. Zań fakýltetteriniń túlekteri kóbine Ulttyq ulan qataryna qabyldanady, sebebi bul qurylym quqyq qorǵaý salasyna kadr daıyndaıtyn negizgi baza sanalady», deıdi «Qazaqstan Qarýly Kúshteri ardagerleri» respýblıkalyq qoǵamdyq birlestiginiń ókili.
Aıta keteıik qarashanyń aıaǵyna deıin Ulttyq ulan men TJM qutqarý bólimderine áskerge alý jalǵasady. Bul qurylymdarǵa úmitkerlerge qoıylatyn talaptar da joǵary – dene daıyndyǵy men kásibı qabileti qatań baǵalanady. Jalpy, bıyl elordadan 1 200-den astam jas sarbaz áskerge jóneltiledi.
