Mańǵystaý oblysy ákimi birinshi orynbasarynyń bekitýimen «Mańǵystaý oblysynda 25 qazan - Respýblıka kúnin atap ótýdi uıymdastyrý jáne ótkizý jónindegi is-sharalar jospary» jasaqtaldy.
- Atalǵan jospar tórt negizgi baǵytty qamtıdy. Olardyń qatarynda uıymdastyrý-daıyndyq is-sharalary, aqparattyq-ımıdjdik jumys, saltanatty is-sharalar jáne jalpy respýblıkalyq is-sharalar bar. Atap aıtqanda, 24 qazan kúni qala jáne aýdan ákimderiniń qatysýymen saltanatty jıyndar ótedi. 25 qazan kúni - QR Memlekettik Tý kóterý rásimi uıymdastyrylady. Osy kúni «Bereke Fest» aksııasy aıasynda otandyq ónimder jármeńkesi ótip, taýarlar halyqqa qoljetimdi baǵamen usynylady. Jastardyń patrıottyq rýhyn kóterý maqsatynda 100 oqýshy bir mezette Memlekettik Ánurandy oryndaý fleshmoby túsirildi. Bul beınerolık mereke qarsańynda áleýmettik jelilerde jarııalanady, dedi óńirlik aqparat jáne qoǵamdyq damý basqarmasynyń bólim basshysy Injý Turarova.
Sonymen qatar, 23 qazan kúni memlekettik mekeme qyzmetkerleri arasynda «Adal qoǵam – Quiz» zııatkerlik saıysy ótedi.
25 qazan kúni saǵat 14:00-de Aqtaý qalasy «Dostyq» úıinde «Otbasy – baqyttyń bastaýy» atty «Otbasy Fest» festıvali jáne saǵat 13:00-de «Renaissance by Sulo» qonaq úıinde shyǵarmashylyq pen tabıǵatty úndestiretin «GREEN BEAT» ekologııalyq festıvali uıymdastyrylady.
Mańǵystaý oblystyq mádenıet, tilderdi damytý jáne arhıv isi basqarmasynyń bólim basshysy Ásem Áshirova ulttyq mereke kúnine oraı uıymdastyrylatyn mádenı is-sharalarǵa toqtaldy.
- 22 qazan kúni saǵat 21:00-de «Abyl Taraquly atyndaǵy ult aspaptar orkestri» ujymynyń QR Respýblıka kúnine oraı «Aqtaý túni» atty konserti ótedi. 23 qazan kúni saǵat 19:00-de «Abaı» mádenı-demalys kesheninde «Eńsesi bıik - egemen el» atty merekelik konsert ótedi. 24 qazan kúni saǵat 15:00-de «Dostyq» úıinde oblys ákiminiń qatysýymen saltanatty merekelik is-shara ótedi. Is-sharaǵa elimizge tanymal juldyzdar Qýandyq Rahym jáne «IL Canto» kvarteti qatysady. 23 qazan saǵat 19:00-de N.Jantórın atyndaǵy oblystyq mýzykalyq-drama teatrynda «Biz de ǵashyq bolǵanbyz» qoıylymy, 24 qazan saǵat 19:00-de «Mahabbat qyzyq mol jyldar» qoıylymy jáne 26 qazan kúni saǵat 19:00-de N.Saýdanbekuly «Álıhannyń amanaty» spektakli sahnalanady. Oblystyq mýzeı jáne kitaphanalarda «Erkin eldiń erteńi» merekelik is-sharalar, ádebı-sazdy keshter, kitap kórmeleri, mádenıet úılerinde merekelik konsertter uıymdastyrylmaq. Sondaı-aq, 25 qazan kúni saǵat 19:00-de Beıneý aýdany Beıneý aýylynda «Tekti jyrdyń sazymen, babalar rýhyn oıatam» atty Qazaqstannyń eńbek sińirgen qaıratkeri, daryn memlekettik jastar syılyǵynyń ıegeri Aıgúl Elshibaevanyń shyǵarmashylyq konserti uıymdastyrylady, dedi Ásem Áshirova.
Mańǵystaý oblysy
