Jastar jalyndaǵan chempıonat

Júldesiz qalǵan jampozdar

Qurama sapynda halyqaralyq týrnırge qatysyp, baǵyn synap júrgen boksshylardyń básekesi bıyl da tartysty ótti. Kópshilik álem chempıony 37 jastaǵy Temirtas Júsipovke zor senim artqan edi. Buǵan deıin 48 kg salmaqta rıngke shyǵyp júrgen ol, bıyl 50 kg salmaqta baq synady. Alǵashqy kezdesýinde Birjan Nurymbetovti jeńgenimen, 1/4 fınalda Nursultan Nurıdenovten aılasyn asyra almady. Temirtas jıi qatelikke boı aldyryp, jeńisti ýysynan shyǵaryp aldy. Osylaısha, elimizdiń 8 dúrkin chempıony Semeı tórinen qur qol qaıtty.

– Júldesiz qalǵanyma esh ókinbeımin. Barymdy saldym, biraq qarsylasym menen áldeqaıda jas, shapshań qımyldap, belsendi boldy. Jumys isteýim kerek. Boksty jalǵastyramyn ba, álde basqa salaǵa ketemin be, ony aldaǵy kúnder kórsetedi, – dedi T.Júsipov.

Júldesiz qalǵandardyń arasynda 2017 jylǵy álem chempıonatynyń kúmis júl­degeri Ábilhan Amanqul da bar. 2021 jyly Tokıo Olımpıadasynyń shırek fınalynda súringennen keıin kásipqoı boksta baq synaǵan Ábilhan tórt jyldyq úzilisten keıin qaıta el birinshiliginde boı kórsetti. Birinshi jekpe-jeginde jeńiske jetken ol dodany shırek fınaldan aıaqtady.

60 kg salmaqta el chempıony Talǵat Syrym­betov ataǵyn qorǵaı almady. 1/8 fınalda oǵan jastar arasyndaǵy álem chem­pıonatynyń qola júldegeri Janseri Kó­sher­baev qarsylas atandy. Jas boksshy saýatty qımylynyń arqasynda birinshi raýndty óz enshisine jazdy. Ekinshi raýndta qos boksshy baspen soqtyǵysyp, aıqas ýaqytynan buryn toqtatyldy. Nátıjesinde, tóreshilerdiń sheshimimen J.Kósherbaev 4:1 esebimen jeńiske jetti. Janseri alǵashqy aınalymda el chempıony Erbolat Sabyrdy toqtatqan edi.

Byltyr Qaraǵandyda ótken birinshilikte 86 kg salmaqta qarsylasynyń barlyǵyn qoǵadaı japyrǵan Temirlan Muqataev 90 kg salmaqqa aýysyp, ekinshi kezdesýinde jarystan shyǵyp qaldy. Shırek fınalda kópshiliktiń asyǵa kútken kezdesýi Sanjar-Álı Begalıev pen elimizdiń birneshe dúrkin júldegeri, álem chempıonatyna qatysýshy Nurqanat Raıystyń aıqasy nebári bir mınýtqa ǵana sozyldy. Jastar arasynda álem chempıony Sanjar-Álı joıqyn soqqysymen Nurqanatty nokaýtqa jiberdi.

Áıelder arasynda Rıo Olımpıadasynyń qola júldegeri Darıǵa Shákimova 65 kg sal­maqta alǵashqy kezdesýinde-aq jasós­pirimder arasynda Azııa chempıony Nazerke Serikke qarsylyq kórsete almady. Sondaı-aq álem birinshiliginiń jeńimpazy Lázzat Kúngeıbaeva da bul chempıonattan bos qaıtty.

Jıyrmadaǵylar des berer emes

Jastar arasynda álem chempıonatynyń birneshe júldegeri ulttyq quramanyń tizimine endi. Atap aıtsaq, Nurzat Ońǵarov (20 jas, 50 kg), Beksultan Boranbek (19 jas, 55 kg), Ilıa Kalının (20 jas, 65 kg), Nurbek Mursal (20 jas, 70 kg), Sanjar-Álı Begalıev (20 jas, 80 kg), Dáýlet Tólemisov (19 jas, 85 kg), Aslan Edilbaıuly (19 jas, +90 kg) birinshiliktiń altyn, kúmis, qola júldegeri atandy.

Jyldyń basynda alǵash ret 22 jasqa deıingiler arasynda el chempıonaty uıym­dastyrylǵan edi. Sol kezde fınalǵa shyqqan boksshylardyń arasynan tek Ábdiǵalym Ábdikerim (65 kg) ǵana jartylaı fınalǵa ótti. О́kinishke qaraı, myqty degen Dıas Berikbaı (50 kg), Nurıslam Qaldybaev (60 kg), Tileýberdi Súleımen (50 kg), Kenje Murat­uly (55 kg), Aǵajan Qadyr (70 kg), Islam Bıtaev (80 kg), Azatbek Joldashan (92 kg) shırek fınaldan asa almady.

Eresekter arasynda tuńǵysh ret chempıon atanǵandardyń arasynan 85 kg salmaqtaǵy Dáýlet Tólemisov eń jas jeńimpaz atansa, áıelder sapynda Elına Bazarova (21 jas, 54 kg), Uljan Sársenbek (20 jas, 57 kg), Baqyt Seıdish (20 jas, 70 kg), Valerııa Aksenovalar da (24 jas, +80 kg) óz salmaqtarynda tuńǵysh ret bıik tuǵyrdan kórindi. Eń jasy úlken chempıon retinde bes balanyń anasy Áıgerim Sáttibaeva (34 jas, 48 kg) tirkeldi. Ol buǵan deıin 2010 jyly top jarǵan edi. Eń jas chempıon ataǵyn Uljan Sársenbek (20 jas) pen Baqyt Seıdish (70 kg) ıemdendi. Eń úzdik boksshylar – Sabyrjan Aqqalyqov (75 kg) pen Jazıra Oraqbaeva (51 kg). Beıresmı komandalyq esepte Túrkistan oblysy – 4 altyn, 1 kúmis, 3 qola medalmen kósh bas­tasa, Almaty qalasy (2+3+6) ekinshi orynnan kórindi. Úzdik úshtikti Shymkent qalasy túıindedi (2+2+6).

Fınaldyq jekpe-jekter

Fınaldyq básekeler barynsha tartysty, qyzyqty ótti. 55 kg salmaqta synǵa túsken álem chempıony Sáken Bıbosynov pen álem kýbogi kezeńiniń jeńimpazy Nursultan Altynbek arasyndaǵy jekpe-jek kórermenderdiń aıy­zyn qandyrdy. S.Bıbosynov judyryqtasý kezinde qarsylasynan birneshe soqqy ótkizip, nátıjesinde birinshi raýndty 2:3 esebimen aıaqtady. Degenmen tájirıbeniń aty – tájirıbe. Tez óz-ózine kelgen Sáken qalǵan eki raýndta jeńiske laıyqty judyryqtasyp shyqty. 60 kg salmaqtaǵy Serik Temirjanov pen Bıbarys Jeksenniń jekpe-jegi 4:1 esebimen aıaqtaldy demeseńiz, eń tartysty ótken aıqastyń biri boldy. 75, 80 kg salmaq dárejelerinde tehnıkalyq nokaýt tirkeldi. Sabyrjan Aqqalyqov ekinshi raýndta Tımýr Nurseıitovti tehnıkalyq nokaýtpen jeńse, Erasyl Jaqpekov birinshi raýndta-aq Dıas Moljigitovti sol qolmen sulatyp túsirdi.

Fınaldyq jekpe-jekterdiń nátıjeleri. Erler: 50 kg. Danııal Sábıt (Batys Qazaqstan oblysy) – Bekzat Aldamjarov (Aqtóbe oblysy) – 5:0; 55 kg. Sáken Bıbosynov (Túrkistan oblysy) – Nursultan Altynbek (Qyzylorda oblysy) – 5:0; 60 kg. Serik Temirjanov (Pavlodar oblysy) – Bıbarys Jeksen (Jambyl oblysy) – 4:1; 65 kg. Sanatáli Tóltaev (Mańǵystaý oblysy) – Ertýǵan Zeınýllınov (Almaty oblysy) – 4:1; 70 kg. Abylaıhan Júsipov (Qaraǵandy oblysy) – Farýh Toqtasynov (Almaty) – 5:0; 75 kg. Sabyrjan Aqqalyqov (Qaraǵandy oblysy) – Tımýr Nurseıitov (Astana); 80 kg. Erasyl Jaqpekov (Abaı oblysy) – Dıas Moljigitov (Jambyl oblysy); 85 kg. Dáýlet Tólemisov (Aqtóbe oblysy) – Sultanbek Aıbaruly (Almaty) – 5:0; 90 kg. Saǵyndyq Toǵambaı (Túrkistan oblysy) – Nurmaǵamed Iýsýpov (Qaraǵandy oblysy) – 3:2; +90 kg. Nurlan Saparbaı (Túrkistan oblysy) – Aslan Eldibaıuly (Qyzylorda oblysy) – qarsylasy jaraqatyna baılanys­ty jekpe-jekke shyqpaǵandyqtan, jeńis Saparbaıǵa berildi.

Áıelder: 48 kg. Áıgerim Sáttibaeva (Jambyl oblysy) – Ánel Qudaıbergen (Jetisý oblysy) – 5:0; 51 kg. Jazıra Oraqbaeva (Almaty) – Anıta Ádisheva (Qaraǵandy oblysy) – 5:0; 54 kg. Elına Bazarova (Shymkent) – Jaına Shekerbekova (Shymkent) – 4:1; 57 kg. Uljan Sársenbek (Túrkistan oblysy) – Karına Ibragımova (Aqmola oblysy) – 5:0; 60 kg. Rımma Volosenko (Astana) – Anar Tursynbek (Jetisý oblysy) – 4:1; 65 kg. Laýra Esengeldi (Shymkent) – Arýjan Jańabaeva (Túrkistan oblysy) – 4:1; 70 kg. Baqyt Seıdish (Almaty) – Mádına Nurshaeva (Shymkent) – 3:2; 75 kg. Valentına Halzova (Astana) – Marııa Sıdorenko (Jetisý oblysy) – 5:0; 80 kg. Nadejda Rıabes (Qostanaı oblysy) – Anastasııa Rylına (Qostanaı oblysy) – Rıabes birinshi raýndta tehnıkalyq nokaýtpen jeńdi; +80 kg. Valerııa Aksenova (Aqmola oblysy) – Ásel Toqtasyn (Almaty) – 4:1.

ASTANA – SEMEI – ASTANA