Shýche qalasyndaǵy Marfýǵa Bektemirova atyndaǵy kóshede bilimniń qara shańyraǵy sanatyndaǵy qazaq mektep-ınternaty ornalasqan. Aqyn osy mektepte bilim alǵan. Týǵan jerge degen perzenttik peıili, tańnyń móldir shyǵyndaı mahabbaty móldirep turǵan jyrlarymen tanymal Marfýǵa Bektemirova oqyǵan kabınetke aqynnyń aıaýly esimi berildi. Onda avtordyń shyǵarmasymen tanysyp, rýhymen syrlasýǵa arnalǵan kezdesý boldy. Aqyn atyndaǵy qaıta jabdyqtalǵan kabınettiń ashylý saltanatynda Býrabaı aýdany ákiminiń orynbasary Mereı Ramazan quttyqtaý sóz sóılese, etnograf, tarıh ǵylymynyń doktory Jambyl Artyqbaev, Qazaqstan Respýblıkasy Ortalyq ardagerler keńesiniń múshesi Bolat Temirbaev, el aǵasy Serik Sábıtov Marfýǵa murasy týraly tereńnen tolǵap syr shertti. Aqynnyń jary, Halyqaralyq «Alash» syılyǵynyń laýreaty Esengeldi Súıinov Marfýǵa murasyn nasıhattaý barysyndaǵy atqarylyp jatqan sharýalarǵa toqtaldy. Kókireginde jattalyp qalǵan jan tebirenterlik ádemi estelikterimen bólisti.
Aqyn ómiri izgilikter álemi. О́negeli ómir jolynan órilgen esti estelikter keıingiler úshin ǵıbrat. Kabınette bilim alyp jatqan oqýshylar aqyn óleńderin, ózderiniń tyrnaqaldy jyrlaryn oqyp, kópshilik kóńilin bir serpiltip tastady. Bar ǵumyryn boz dalanyń boztorǵaıy ispetti týǵan topyraǵyn jyrlaýǵa arnaǵan Marfýǵanyń ózi «túsinse urpaǵyma máńgi ólmeıtin, óleńnen bir eskertkish qaldyramyn» depti. Aıtsa aıtqandaı, ómirsheń óleńderimen ǵıbratty ǵumyryn óskeleń urpaqqa ónege etkeni de shyndyq. Zamanynda shyǵarmashylyǵy týraly Memlekettik syılyqtyń laýreaty Aqseleý Seıdimbek paıymdy pikir bildirgen eken. «Marfýǵa Bektemirova shynaıy sezimniń aqyny. Onyń óleńderiniń altyn arqaýy – adam, qoǵam, tabıǵat. Túptep kelgende, óner ataýlynyń tuǵyry da osy úshtaǵan. Bir-birimen uly tutastyqta bolatyn osy úshtaǵan qubylystan Marfýǵa bárin-bárin de taba alǵan, tanı alǵan. Onyń óleńderin oqyǵanda júregiń tazarady, úlken armannyń áldıine bólenesiń. Týǵan jerińniń qadir-qasıetin tereńirek sezine túsesiń».
Aqyn shyǵarmashylyǵynyń shynaıy baǵasy osy. Kesh sońynda bilim oshaǵynyń ónerpazdary Marfýǵa Bektemirovanyń sózine jazylǵan ánderdi, tól ánderin oryndap, jınalǵan qaýymnyń kóńilin bir kóterdi.
Aqmola oblysy
