S.Qojamqulov atyndaǵy Ulytaý oblysynyń qýyrshaq trýppasyna bıyl 40 jyl toldy. Osy mereıtoıǵa Qazaqstannyń eńbek sińirgen qaıratkeri, Astanadaǵy M.Gorkıı atyndaǵy Memlekettik akademııalyq orys drama teatrynyń bas rejısseri Bekpýlat Parmanov dat jazýshy-ertegishisi Gans Hrıstıan Andersenniń álemdik klassıkaǵa aınalǵan «Usqynsyz úırek» qoıylymyn balalarǵa tartý etti.
Eksperımentaldyq baǵyttaǵy spektaklde bul joly qýyrshaqtar emes, túrli qus pishinindegi, jartylaı maskadaǵy ártister oınady.
Qoıylym úırekterdiń otbasynda dúnıege kelgen balapannyń basynan keshkenderin arqaý etken. Balapan qatarlastarynyń eshqaısysyna uqsamaıdy. Syrt kelbeti ǵana emes, ózgeshe oılaýy, ózin basqasha sezinýi arqyly basqa balapandardan erekshelenip turatyn ony «usqynsyz» dep jábirlep, qııanat jasaıdy. Tek anasy ǵana ony ózgelerdiń jábirleýinen qorǵaıdy. Keleke men mazaqqa shydamaǵan balapan ózin qabyldamaǵan ortadan ketip qalýǵa májbúr bolady. Biraq ol moıymaı, kezdesken qıyndyq pen kedergige qarsy turady. Jalǵyzdyq janyna batsa da ózine degen senimin joǵaltpaı, zeńgir aspanda qalyqtap ushýdy úırenedi. Qorǵansyz balapan ósip, sulý aqqýǵa aınalady. О́zin jaqsy túsinetin syńaryn tabady.
«Spektakldiń jelisi balalarǵa túsinikti ári qyzyqty bolýǵa barymyzdy saldyq. Qýyrshaq teatry jas urpaqty mádenıetke, izgilikke, adamgershilikke tárbıeleýdiń quraly. Qýyrshaqqa jan bitirip, oınatyp, qulpyrtyp jiberý ońaı emes. Jasyratyny joq, qýyrshaq teatryna kásibı mamandar jetispeıdi. Teatr únemi izdeniste, jańarý jolynda bolýy kerek» deıdi qoıýshy rejısser Bekpýlat Parmanov.
Kórermen budan naǵyz sulýlyq kózge kórinip turǵan syrt beınede emes, ishki jan dúnıede – júrekte, boıdaǵy meıirim men mahabbatta, tabandylyqta degen oı túıedi.
Ulytaý oblysy
