Májilis delegasııasynyń Tbılısıdegi jumysy Grýzııa Parlamentinen bastaldy. Erlan Qoshanov áriptesi Shalva Papýashvılımen kezdesýde Qazaqstan halyqtarymyzdyń ortaq tarıhy men berik dostyǵyn aıryqsha baǵalaıtynyn atap ótti. Munyń bári eki el arasyndaǵy tabysty ári uzaq merzimdi yntymaqtastyqtyń kepili ekenine nazar aýdardy.
– Osydan jarty jyl buryn Grýzııanyń Premer-mınıstri Kobahıdze myrza bizdiń elge resmı saparmen kelgen bolatyn. Prezıdent Qasym-Jomart Toqaevpen kezdesý barysynda elderimiz kóp qyrly qarym-qatynastardy nátıjeli damytýǵa baǵdar alǵany týraly aıtyldy. Saýda, energetıka, ónerkásip, ınvestısııa, týrızm salasyndaǵy yntymaqtastyqtyń keń perspektıvalary talqylandy. Bizdiń parlamenttik dıplomatııamyz joǵary deńgeıdegi ýaǵdalastyqtardy iske asyrýǵa eleýli úles qosatynyna senimdimin, – dedi Májilis spıkeri.
Ol sondaı-aq spıker Shalva Papýashvılıdiń 2024 jyly Astanaǵa resmı saparmen kelgenin, sol saparda qos el parlamentteri arasyndaǵy yntymaqtastyqty jandandyrý joldary qaralǵanyn eske saldy.
Erlan Qoshanov grýzııalyq áriptesine Qasym-Jomart Toqaevtyń bastamasymen Qazaqstanda júzege asyrylyp jatqan saıası jáne ekonomıkalyq ózgerister týraly, sonyń ishinde bir palataly Parlamentke kóshý jospary jaıynda aıtyp berdi. Bul reforma parlamentarızm ınstıtýtyn kúsheıtetinin atap ótti. Bastama barlyq saıası partııanyń jáne jalpy jurtshylyqtyń qatysýymen talqylanyp jatqanyna mán berdi.
Májilistiń zań shyǵarý qyzmetine toqtalǵan Erlan Qoshanov áleýmettik ádildikti qamtamasyz etýge, «Zań men tártip» qaǵıdatyn iske asyrýǵa, ekonomıkany damytýǵa baǵyttalǵan zańdar týraly egjeı-tegjeıli aıtty.
О́z kezeginde Shalva Papýashvılı grýzın jáne qazaq halyqtaryn tarıhy tereńnen tamyr tartatyn erekshe dostyq qarym-qatynas baılanystyryp turǵanyn atap ótti. Ol búgingi tańda osy berik baılanysty joǵaltyp almaı, nyǵaıta túsý úshin bar kúsh-jigerdi jumsaý qajettigin jáne bul baǵa jetpes murany jastarǵa amanat etý mańyzdy ekenin basa aıtty. Grýzııa Parlamentiniń tóraǵasy Májilis spıkeriniń sapary saıası dıalogqa tyń serpin beretinine senim bildirdi. Sondaı-aq saýda-ekonomıka, mádenı-gýmanıtarlyq, kólik-logıstıka jáne basqa da salalardaǵy naqty máselelerdi sheshýde eki el depýtattary arasyndaǵy tikeleı baılanystardy keńeıtýdiń mańyzdylyǵyn atap ótti.
Kezdesý barysynda taraptar ınvestısııa, týrızm, óndiris, agroónerkásip jáne ınnovasııalardy damytý baǵytynda ózara tıimdi yntymaqtastyqty tereńdetýge zańnamalyq turǵyda qoldaý kórsetýge daıyn ekenin bildirdi. Depýtattar aldaǵy ýaqytta da zań shyǵarý baǵytynda tájirıbe almasýǵa, dostyq toptary, salalyq komıtetter, partııalyq fraksııalar jáne parlamentter apparattary jelisi boıynsha baılanysty nyǵaıta túsýge ýaǵdalasty.
Spıkerler Parlamentaralyq odaq jáne EQYU Parlamenttik Assambleıasy syndy kópjaqty alańdarda tyǵyz is-áreket jasaý múmkindikterin talqylady. Qazaqstan men Grýzııany beıbitshilik pen turaqtylyqty saqtaýǵa, halyqaralyq quqyq pen ózara senim qaǵıdattaryn qurmetteýge degen talpynys biriktiretini aıtyldy.
Kezdesý sońynda taraptar Qazaqstan Respýblıkasy Parlamenti Májilisi men Grýzııa Parlamenti arasyndaǵy Yntymaqtastyq týraly memorandýmǵa qol qoıdy. Qujatta saıası dıalogty damytý, ózara senim men túsinistikti nyǵaıtý týraly kelisimder, zańnama salasynda tájirıbe almasý jónindegi josparlar qamtylǵan.
Grýzııa Prezıdenti Mıhaıl Kavelashvılımen kezdesýde Erlan Qoshanov Qazaqstan Prezıdenti Qasym-Jomart Toqaevtyń jyly lebizin jetkizdi. Ol Memleket basshysy Grýzııamen qarym-qatynasty nyǵaıtýǵa árdaıym erekshe kóńil bóletinin, eki eldi tereń tarıhı tamyrlastyq, san ǵasyrlyq dostyq dástúrleri baılanystyratynyn aıtty.
Májilis spıkeri grýzın halqyn Parlament jáne Prezıdent saılaýynyń sátti ótýimen quttyqtap, Grýzııa quqyqtyq, ekonomıkalyq turǵyda damyǵan, ashyq memleket quryp jatqanyn atap ótti.
Sondaı-aq Qazaqstanda «Kúshti Prezıdent – yqpaldy Parlament – esep beretin Úkimet» formýlasyn iske asyrý aıasynda aýqymdy saıası ózgerister júrgizilip jatqanyna nazar aýdardy. Bul oraıda Erlan Qoshanov barlyq salaǵa jasandy ıntellekt jetistikterin engizip, aldaǵy úsh jylda eldi Sıfrlyq memleketke aınaldyrý jónindegi úlken maqsatty iske asyrý týraly Prezıdenttiń bastamalaryna jan-jaqty toqtaldy.
Premer-mınıstr Iraklıı Kobahıdzemen kelissóz barysynda bızneske jasalyp jatqan jaǵdaılardy birlesip odan ári jetildirý, tranzıt áleýetin arttyrý, ónerkásip, metallýrgııa, mashına jasaý jáne agroónerkásip sektoryndaǵy ózara is-áreket perspektıvalary talqylandy. Májilis tóraǵasy óz tarapynan eki el depýtattary joǵary deńgeıdegi ýaǵdalastyqtardy zańnamalyq turǵyda qoldaýdy ýaqtyly qamtamasyz etýge árqashan daıyn ekenin aıtty.
Sapar aıasynda depýtattar Grýzııa Parlamentiniń mýzeıin aralady.
