Saltanatty is-sharadaǵy sózinde mınıstr Abaı Qunanbaıuly – qazaq halqynyń rýhanı kemeldenýine baǵdar bolǵan, adamzattyń asyl murattaryn nasıhattaǵan uly tulǵa ekenin, onyń shyǵarmalary adamzatty adamgershilik, ádildik, bilim men eńbek arqyly izgilikke úndeıtinin atap ótti. Sondyqtan da Abaı bıýstiniń dál Rım qalasynda boı kóterýi – mádenıetter men órkenıetter arasyndaǵy rýhanı kópirdiń belgisi bolary
anyq.
«Keıingi jyldary memleketterimiz arasyndaǵy qarym-qatynas erekshe serpin aldy. О́tken jyly Qazaqstan Respýblıkasy Prezıdentiniń Italııaǵa resmı sapary men Italııa Mınıstrler keńesi tóraıymynyń Qazaqstanǵa jasaǵan resmı sapary yntymaqtastyqty jańa deńgeıge kóterdi.
Qyrkúıek aıynda Italııa Prezıdenti Qazaqstanǵa kelip, jańa baılanystarǵa jol ashyp, birqatar mańyzdy kelissóz jasaldy. Búgingi Abaı eskertkishiniń ashylýy – sol kelisimderdiń kórinisi, eki halyq arasyndaǵy dostyq pen ózara qurmettiń belgisi dep bilemin», dedi A.Balaeva.
Aıta ketsek, qazaqtyń uly aqyny Abaıdyń esimi shetelde zor qurmetke ıe. Aqynǵa arnalǵan eskertkishter, bıýster men monýmentter álemniń kóptegen iri qalasy men astanasynda ornatylǵan. Olardyń qatarynda, Tashkent, Máskeý, Qazan, Bishkek, Beıjiń, Kaır, Býdapesht, Tehran, Ankara, Ystanbul, Nıý-Delı, Jeneva, Parıj, Renn, Saraevo, Tbılısı, Berlın, Seýl, Harkov, Baký, Rıo-de-Janeıro qalasy bar.
Osy is-sharadan soń Aıda Balaeva men Erbolat Sembaev Italııadaǵy Shyńǵys Aıtmatov eskertkishine de gúl shoqtaryn qoıdy.
