Foto: gov.kz
Medıaaptanyń alǵashqy kúni «Jasandy ıntellekt pen sıfrlandyrý kezeńindegi jýrnalıstıkanyń jańa baǵyttary: qoǵam senimi jáne órkendeý» atty plenarlyq sessııamen ashyldy. Halyqaralyq jáne otandyq medıa kásibı mamandaryn, medıabıznes ókilderi men memlekettik organdardy biriktiretin mańyzdy alańǵa Mádenıet jáne aqparat mınıstri Aıda Balaeva kelip, forým jumysyna tabys tiledi.
«Aqparat basty resýrsqa aınalǵan zamanda bizdiń osyndaı basqosýlarymyzdyń mańyzy erekshe. Sebebi dál osyndaı alańda ǵana biz ózekti máselelerdi ashyq talqylap, qorytyndy jasap, sonyń negizinde bıznes pen memlekettik basqarý júıesine qatysty mańyzdy sheshimder qabyldaı alamyz. Búginde Qazaqstan keńistik pen ýaqyt toǵysyndaǵy erekshe kezeńdi bastan ótkerýde. Memleket, qoǵam jáne medıa azamattardyń suranysyna saı, eldiń aldaǵy damýynyń zamanaýı baǵyt-baǵdaryn aıqyndap keledi. Memleket basshysynyń «Ádiletti Qazaqstandy» qurý isinde osyndaı ózara bekem baılanys berik irgetasqa aınalýǵa tıis degeni de beker emes», dedi Aıda Balaeva.
Mınıstr Digital News Report zertteýin negiz etip, Qazaqstan azamattarynyń buqaralyq aqparat quraldaryna degen senim deńgeıi Ortalyq Azııadaǵy basqa eldermen salystyrǵanda aıtarlyqtaı joǵary ekenin atap ótti. Mundaı oń kórsetkishke medıasalany reformalaý aıasynda qol jetkizilgen. Sondaı-aq Qazaqstan óńirde alǵashqylardyń biri bolyp halyqaralyq standarttarǵa, sonyń ishinde Digital Services Act qaǵıdattaryna negizdelgen «Onlaın-platformalar jáne onlaın-jarnama týraly» zań qabyldaǵan. Jańa «Mass-medıa týraly» zań redaksııalardyń quqyqtyq mártebesin kúsheıtip, jýrnalısterdi qorǵaý tetikterin keńeıtken.
Plenarlyq sessııada Mádenıet jáne aqparat vıse-mınıstri Qanat Ysqaqov, Euronews-tiń Qazaqstandaǵy bıýro jetekshisi Boıan Brkıch, Euronews halyqaralyq tilshisi (Fransııa) Denıs Lokte, О́zbekstan Ulttyq medıa qaýymdastyǵy bas dırektorynyń orynbasary Sanjar Ýstaboboev, Túrkııa radıotelevızııalyq korporasııasynyń (Túrkııa) Qazaqstandaǵy ókildiginiń dırektory Mehmed Zahıd Chalyshkan jáne «Jetinshi arna» telearnasynyń bas dırektory Ilham Ibragımov sóz sóıledi.
Medıa shara ári qaraı «Jýrnalıstıka toǵysynda: jasandy ıntellekti bar sıfrlyq medıanyń paıda bolýy» atty paneldik sessııamen jalǵasty.
Aldaǵy eki kúnde medıaortalyq hollynda Astana Media Week 2025 kontent-marketi ótedi. Bul – jańa format, koprodýksııalar jáne halyqaralyq kooperasııalar tanystyrylatyn alań. Kontent-market prodakshn-kompanııalar, dıstrıbıýtorlar jáne platformalar arasynda ózara iskerlik kezdesýler ótkizýge múmkindik beredi. Munda Qyrǵyzstan, О́zbekstan, Qytaı men elimizdiń ishki jáne syrtqy naryqtaryna arnalǵan jańa ıdeıa men qanatqaqty jobalar men birlesken óndiris múmkindikteri usynylady.
El óńirlerinen kelgen BAQ ókilderi úshin plenarlyq jáne paneldik talqylaýlar, jabyq pıtchıng-sessııalar ótedi. Saladaǵy jetekshi sarapshylar praktıkalyq sheberlik dáristerin uıymdastyrady.
