Kásiporyn óńirdegi qurylys kompanııalary men jergilikti turǵyndardy sapaly, ekologııalyq taza jáne básekege qabiletti otandyq qurylys materıaldarymen qamtamasyz etýge baǵyttalǵan. Jobanyń jalpy quny – 2 mlrd teńge. Zaýyttyń jyldyq qýattylyǵy – 6 mıllıon dana keramıkalyq kirpish.
Borodýlıha aýdanynyń Novopokrovka aýylynda ornalasqan jańa óndiris ornynyń ashylý rásimine qatysqan oblys ákimi Berik Ýálı jańa zaýyt aımaq ekonomıkasyna tyń serpin beretinin aıtty.
«Búgin biz óńirimizdiń óndiristik kelbetiniń jańa taraýyn ashqaly otyrmyz. Memleket basshysy Qasym-Jomart Toqaev bıylǵy Qazaqstan halqyna Joldaýynda «Qazir el ekonomıkasynda reformalar júrgizilip jatyr. Infraqurylymǵa jáne jańa óndiris oryndaryn ashýǵa qomaqty ınvestısııa salynyp jatyr. Munyń bári halyqtyń ál-aýqatyn jáne elimizdiń áleýetin arttyrý úshin jasalyp jatqany aıdan anyq» dep óndiristi damytýdyń maqsatyn, ınvestısııa tartýdyń mańyzyn aıqyndap bergen bolatyn. Búgin óndirisi iske qosylyp, óńir turǵyndarynyń qajettiligine qyzmet etkeli otyrǵan bul kásiporyn jylyna shamamen 6 mln. dana kirpish óndirmekshi. Bul oblys jáne aýdan turǵyndarynyń qurylys materıaldaryna tapshylyǵyn azaıtyp, óńir ekonomıkasyna septigin tıgizedi dep oılaımyn. Aýdan ekonomıkasyna úlken qoldaýyn kórsetip, osyndaı aýqymdy jobany júzege asyryp jatqan jeke ınvestor Qaıyrly Hasenovke alǵys aıtamyn. Qazirdiń ózinde 65 adam jumys istep jatyr eken. Elý adam turaqty jumyspen qamtylady. Bul – aýdan halqy úshin úlken kómek. Bıylǵy mamyr aıynda oblystyń damý josparyn jarııalaǵan bolatynbyz. Osy josparǵa sáıkes Semeı qalasynda jańa yqsham aýdan qurýdy qolǵa aldyq. Munda kóptegen jańa qurylys nysandary salynatyn bolady. Kirpish zaýyty qurylys materıaldaryn daıyndaýǵa úlken septigin tıgizedi. Sondyqtan búgin jumysyn bastaǵaly otyrǵan óndiriske sáttilik tileımin», – dedi aımaq basshysy.
Atalǵan «Shyńǵys Tas» JShS-nyń basshysy Qaıyrly Hasenovtyń aıtýynsha, zaýyttyń tehnologııalyq prosesi tolyq avtomattandyrylǵan jáne energııa tıimdiligi men tabıǵı resýrstardy utymdy paıdalaný qaǵıdattaryna negizdelgen. О́ndiris sıkly saz balshyqty óndirýden bastap, ony keptirý men kúıdirýge deıingi barlyq kezeńderdi qamtıdy. О́nim sapasy ulttyq standarttarǵa saı joǵary beriktik pen aıazǵa tózimdilikke ıe.
«Jumysymyzdy qarqyndy túrde bastap kettik. Bir mıllıon danadan astam kirpishti shyǵaryp qoıdyq. Qazir birqatar kompanııalarmen kóp qabatty turǵyn úıler men mádenıet úılerin salý jóninde kelissóz júrgizilip jatyr. Shyǵys Qazaqstan oblysynan da bizdiń ónimderimizge suranys bar», deıdi kásipker.
Joba 2024 jylǵy sáýir aıynda bastalyp, 2025 jylǵy qazan aıynda tolyq aıaqtalǵan. Nysanda barlyq qurylys-montajdaý jáne iske qosý jumystary júrgizilip, jabdyqtar synaqtan ótken.
Bıyl oblysymyzda jalpy quny 7,3 mıllıard teńge bolatyn alty ınvestısııalyq joba júzege asyrylyp, nátıjesinde 100-den astam jańa jumys orny quryldy. Jyl sońyna deıin quny 18,6 mıllıard teńge bolatyn segiz jobany iske asyrý josparlanyp otyr. Bul jobalar aıasynda qosymsha 271 jańa jumys orny ashylatyn bolady.
Abaı oblysy,
Borodýlıha aýdany
