«Qurmetti Qasym-Jomart Kemeluly! Qazaqstannyń jańa elıtasyn – jas kásipkerlerdi, ınjenerler men IT-mamandardy damytýǵa erekshe nazar aýdaryp kele jatqanyńyz úshin óz alǵysymdy bildiremin. Men qazaqstandyq startaptardyń damýyna, ınvestısııa tartyp, halyqaralyq deńgeıge shyǵýyna qoldaý kórsetetin Pul.vc venchýrlik qurylymynyń negizin qalaýshymyn. Memleket pen kásipkerlerdiń birlesken eńbegi arqyly Qazaqstan ınnovasııalar salasynda óńirlik kóshbasshy bolatynyna senimdimin», delingen habarlamada.
Pul.vc venchýrlik platformasy búginde otandyq startaptardyń damýyna serpin berip, ınvestorlar men jas kásipkerler arasyndaǵy ózara baılanysty nyǵaıtýǵa úles qosyp keledi.
«Kásipkerdiń joly óte aýyr, qulaısyń, odan qaıta turasyń. Alǵashynda óte qıyn kezeńderden óttik. Mysaly, ınvestısııa tartý úshin uzaq ýaqyt ketedi. Startap bastaǵan kezde kóp nárseni bilmeıtinbiz. Kóp startaperler birden ónimin jasap, onyń naryqtaǵy suranysyn zerttemeı jiberedi – bul úlken qatelik. Men de solaı qatelestim. Sondyqtan biz qazir aqsha emes, eń aldymen adamı resýrs beremiz. Iаǵnı ár jobany sol saladaǵy mamandarmen biriktirip, suranysqa ıe ónimdi izdeımiz», deıdi kásipker Baǵlan Oljabaev.
Onyń aıtýynsha, Pul.vc platformasynyń basty ereksheligi — jas startaperlerge baǵyt-baǵdar berip, olardyń naryqqa beıimdelgen ıdeıalaryn júzege asyrýǵa kómektesý.
Baǵlan Baýyrjanuly Memleket basshysynyń jastar men ınnovasııalyq kásipkerlikke kóńil bólýi búgingi býyn úshin asa mańyzdy ekenin aıtady.
«Qazir kóptegen jas kásipkerler men IT mamandary neden bastaryn bilmeı júredi. Kókeılerinde suraq kóp, biraq kimnen suraryn bilmeıdi. Sondyqtan Prezıdenttiń memleket tarapynan osyndaı ımpýls berip jatqany qýantady. Buryn mundaı múmkindikter az bolatyn. Tek Astana Hub pen Most IT Hub qana bolatyn. Jaqynda Higgsfield AI degen startap jarq etti. Kapıtalızasııasy mıllıard dollarǵa jetken. Sol jaqsy túrtki boldy. Biz Qazaqstannan shyǵatyn osyndaı startapty uzaq kúttik. Endi mundaı jobalarǵa kórsetiletin qoldaý kóbeıip, jańa startaptardyń sany da arta bastaıdy. Sıngapýr, MENA elderinen Qazaqstan ekonomıkasyna degen qyzyǵýshylyq artady. Sol kezde memleket qolǵa ala bastasa nur ústine nur bolady», deıdi ol.
Kásipkerdiń pikirinshe, memleket pen jeke sektordyń birlesken jumysy elimizdi ınnovasııalar ortalyǵyna aınaldyrady.
Byltyr Baǵlan Oljabaev komandasymen birge «Qazinnovations» ınnovasııalardy damytý jónindegi ulttyq agenttigi uıymdastyrǵan grant baıqaýynda jeńimpaz atanyp, 20 mıllıon teńgeden astam qarjylaı qoldaý alǵan.
«Sanat Ahanov bastaǵan agenttik komandasy úlken qoldaý kórsetti. Sol granttyń arqasynda ıdeıamyzdy júzege asyryp, jobamyzǵa venchýrlik ınvestısııa tarta aldyq. Kompanııamyzdyń kapıtalızasııasy 10 mıllıon dollarǵa jetti. Bir jyl boıy Nıý-Iorktegi venchýr bılderde tájirıbe jınap, ony Qazaqstanda iske asyryp jatyrmyz. Biz Sıngapýr júıesimen jumys isteımiz, mundaı format Ortalyq Azııada ázirge joq», deıdi ol.
Kásipkerdiń aıtýynsha, kez kelgen startaptyń tabysy ıdeıa men senimdi komandaǵa baılanysty.
«Jastarǵa aıtar keńesim – aldymen naryqty zerttep, óz klıentińdi tabý kerek. Sosyn myqty komanda qurý qajet. «Sprosı mamý» degen jaqsy kitap bar, sony oqysa, kóp suraqqa jaýap tabady. Eń bastysy – ıdeıańdy júzege asyrýdan qoryqpaý jáne myqty komanda quryp ony artyńnan erte alý», dedi Baǵlan Oljabaev.
Pul.vc venchýrlik platformasy Almaty oblysy men ózge óńirlerdegi jas kásipkerlerge arnalǵan ashyq alańǵa aınalyp otyr. Munda ár startaptyń prezentasııasy qaralyp, áleýeti bar jobalarǵa tájirıbeli mamandar men ınvestorlar tartylady. Baǵlannyń aıtýynsha, jýyrda Pul.vc janynan jas startaperlerdi tegin qoldaýǵa baǵyttalǵan arnaıy qor qurylmaq.
Aıta keteıik, Memleket basshysy Qasym-Jomart Toqaev bıylǵy Joldaýynda elimizde jasandy ıntellekt pen ınnovasııalyq kásipkerlikti damytý, jastardyń tehnologııalyq bilimin arttyrý jáne venchýrlik ekojúıeni qoldaý baǵyttaryna erekshe nazar aýdarǵan bolatyn. Onyń jastardy kásipkerlikke, ınnovasııa men IT salasyna tartý jónindegi saıasaty elimizde jańa býyn kásipkerleriniń qalyptasýyna jol ashty.
Almaty oblysynan shyqqan jas kásipker Baǵlan Oljabaevtyń bastamasy – osy baǵyttaǵy naqty nátıjelerdiń biri. О́ńirlik deńgeıde júzege asyp jatqan Pul.vc sııaqty jobalar memleket pen jeke sektordyń tıimdi seriktestigin kórsetedi. Mundaı bastamalar arqyly Almaty oblysy tek óndiris pen aýyl sharýashylyǵy emes, ınnovasııa men tehnologııa salasynda da aldyńǵy qatarǵa shyǵýǵa bet aldy.
Búginde Astana Hub tehnoparkinde Almaty oblysynan tirkelgen 11 IT-kompanııa jumys isteıdi. Olardyń qatarynda Baǵlan Oljabaevtyń kompanııasy da bar. Bul kásiporyndar salyq jáne vıza jeńildikterin paıdalanady, sondaı-aq seriktestik resýrstar men bıznesti keńeıtý múmkindikterine qol jetkizedi.
Jalpy, Almaty oblysynda jastar kásipkerligin qoldaý baǵdarlamalary belsendi júzege asyrylyp jatyr. Bıyl shamamen 100-ge jýyq jas kásipker óz isin ashý úshin qaıtarymsyz granttar alǵan.
Almaty oblysy
