Májilis depýtaty Nıkıta Shatalov 12 qarasha kúni ótken Májilistiń jalpy otyrysta LGBT nasıhatyna tyıym salýdy kózdeıtin zań jobasyna qatysty óz pikirin bildirdi. Onyń aıtýynsha, keıbir halyqaralyq quqyq qorǵaý uıymdary bul bastamaǵa qarsy málimdemeler taratyp jatyr.
«Búgin aqparat keńistiginde birqatar halyqaralyq quqyq qorǵaý uıymdarynan «LGBT nasıhatyna tyıym salý» jónindegi túzetýlerdi qabyldamaýǵa shaqyratyn málimdemeler taraı bastady. Biraq eshkim ulttyq parlamentke qandaı normalardy qabyldaý keregin nusqaı almaıdy. Aqparattyq qysym arqyly adamnyń kózqarasyn tańýǵa tyrysý - halyqaralyq tájirıbege qaıshy», dedi depýtat.
Shatalovtyń aıtýynsha, bul zań jeke adamdardyń ómirine aralasý emes, qoǵamdaǵy ashyq aqparat keńistigindegi tárbıe men moral máselesine qatysty shara.
«Qazaqstanda eshkim qandaı da bir belgisi úshin qýdalanbaıdy jáne qýdalanýy múmkin emes. Bul – bizdiń Konstıtýsııa men memlekettiń negizgi qaǵıdattaryna qaıshy. Talqylanyp jatqan másele azamattardyń jeke ómirine qatysty emes, ol qoǵamdyq keńistik pen kámeletke tolmaǵandarǵa tárbıelik yqpal etetin aqparatqa baılanysty», dedi ol.
Depýtattyń sózinshe, túzetýlerdiń basty maqsaty – balalar men jasóspirimderdi otbasy men neke týraly túsinikterin burmalaıtyn, qundylyq júıesine keri áser etetin kontentten qorǵaý.
«Bul ózge kózqarastaǵy adamdardyń ómir súrýine tyıym salý emes, qoǵamymyzǵa jat ómir saltyn nasıhattaýdy shekteý áreketi», dedi Shatalov.
Sonymen qatar ol Qazaqstan halyqaralyq mindettemelerin tolyq oryndap otyrǵanyn atap ótti.
«Birde-bir halyqaralyq qujat memleketterge ulttyq tárbıe men qoǵamdyq moral sheńberinen shyǵatyn ıdeologııalyq tájirıbelerdi nasıhattaýǵa mindetteme júktemeıdi. Kerisinshe, Bala quqyqtary týraly BUU konvensııasynyń 17-babynda memleketter balalardy olardyń ál-aýqatyna zııan keltiretin aqparattan qorǵaý sharalaryn qabyldaýy tıis dep naqty kórsetilgen. Osy zańdy qabyldaý arqyly Parlament halyqaralyq mindettemelerge saı áreket etip otyr», dedi depýtat.
Shatalov sonymen birge qoǵamda dástúrli jáne moraldyq qundylyqtar árqashan joǵary bolǵanyn aıtyp, LGBT taqyrybyna qatysty qoǵamdyq narazylyqtyń resmı petısııa túrinde de kórinis tapqanyn eske saldy.
«Ondaǵan myń azamat óz ustanymdaryn bildirip, bılik organdaryna júgindi. Bul qoǵamnyń naqty suranysy. Ony elemeý – ózimiz ókildik etetin qoǵamdy elemeý degen sóz», dedi ol.
Sóziniń sońynda depýtat áriptesterin zań jobasyn qoldaýǵa shaqyrdy.
