Almaty qalalyq Qoǵamdyq keńistikterdi damytý basqarmasy habarlap otyrǵandaı, saıabaqtar, skverler, jasyl aımaqtar qurý jumystary júıeli túrde júrgizilip, barlyq aýdanda bir aýyq damyldap, serýendeıtin oryndar ashylyp jatyr.
Alaıda sońǵy kúnderi saltanatty ashylýyna qala ákimi Darhan Satybaldy ortaqtasqan jańa skverdiń orny bólek. Prezıdenttiń burynǵy rezıdensııasynyń ornynda paıda bolǵan demalys ornynyń ózindik tarıhy bar. Megapolıstegi Nazarbaev dańǵylynyń batysyna qaraı, Gandı kóshesiniń soltústigin alyp jatqan saıabaqty salý úshin memleket qarjysynan bólek, Nurlan Smaǵulov qory 1 mlrd teńge bólip otyr.
«Bul – Almatynyń tórinde ornalasqan tarıhı oryn. О́kinishke qaraı, 2022 jyly Qańtar oqıǵasy kezinde bul ǵımarat qatty búlingen bolatyn. Budan keıin Prezıdentimiz Qasym-Jomart Toqaev osy jerde qala turǵyndary úshin saıabaq salynsyn degen sheshim qabyldap, biz de osy bastamaǵa óz úlesimizdi qosyp, Nurlan Smaǵulov qory 1 mlrd teńge bóldi. Bul istiń kommersııalyq joba emes ekenin aıta ketken jón. О́zderińiz kórip otyrǵandaı, el rızashylyǵyn bildirip jatyr, bala-shaǵa, jastarǵa qosa, úlken kisiler de kelip, kóńilderi kóterilip, seıil qura bastady», dedi Nurlan Smaǵulov qorynyń dırektory Aıdyn Sultanov.
Bul saıabaq ta qoǵamdyq keńistikterdi damytý baǵdarlamasynyń bir bólshegi retinde jaıly qala tujyrymdamasyn júzege asyrýdy kózdeıdi. Nysannyń jalpy aýdany 4,16 gektar bolsa, onyń 3 gektarǵa jýyǵy jasyl jelekke bólengen.
Qurylys jumystary barysynda ınjenerlik, abattandyrý jumystary tolyq oryndaldy. Aýmaqta zamanaýı jaryqtandyrý men avtomatty sýarý júıeleri ornatylyp, 10 myń sharshy metrden astam jaıaý júrginshiler joly tóselip, 77 oryndyq pen 52 qoqys jáshigi qoıyldy. Aýqymdy túrde júrgizilgen kógaldandyrý jumystary kezinde 425 aǵash otyrǵyzylsa, onyń 166-sy qylqan japyraqty, sondaı-aq 590 sándik butalardyń kóshetteri boı kóterdi.
Jańa saıabaqtyń taǵy bir ereksheligi – qysta muz aıdyny retinde paıdalanylatyn jasandy toǵan. Bul toǵan saıabaqty jyldyń tórt mezgilinde jetimsiretpeı, qysta da jurtty ózine tartatyn bolady. Mamandardyń aıtýynsha, abattandyrý kezinde klımattyq jaǵdaılarǵa tózimdi materıaldar men ekologııalyq tehnologııalar qoldanylǵan.
Qalaı desek te, qalanyń qaq ortasynda paıda bolǵan ásem saıabaq búkil almatylyqtardyń ortaq ıgiligine aınalyp, qyzyǵyn jurt jabylyp kóretin qoǵamdyq demalys ornynyń birine aınalatyny daýsyz.
О́z kezeginde Qoǵamdyq keńistikterdi damytý basqarmasy da Almatyda saıabaqtar men jasyl aımaqtardy qurý jónindegi jobalar júıeli túrde iske asyp, shahardyń basqa aýdandarynda da halyq alańsyz serýen quratyn jańa alańdar paıda bolyp jatqanyn aıtady.
Nurlan Smaǵulov qory – jeke qaıyrymdylyq uıym. Mundaı qor qurýdaǵy negizgi maqsat – mádenıet, óner, sport pen áleýmettik mańyzy bar jobalardy qoldap, damytý, sonymen birge elimizdiń daryndy adamdary úshin jańa múmkindikter týdyrý.
Aqıqatynda, qor qurylǵaly beri birqatar saýapty bastamaǵa demeýshi bolyp, sý tasqyny kezinde zardap shekken Oral qalasynyń turǵyndaryna 264 páter satyp áperip, múgedekterge kómek berip, bilim berý mekemeleri men mádenıet jáne óner salasyndaǵy naqty jobalarǵa qarjylaı qoldaý tanytty.
