Eýropalyq odaq – elimizdiń iri saýda ári ınvestısııalyq seriktesi. Bıyl 9 aıda Qazaqstan men EO arasyndaǵy taýar aınalymy 33,1 mlrd dollardy qurady. Osy jyldyń birinshi jartyjyldyǵynda EO elderinen el ekonomıkasyna tikeleı sheteldik ınvestısııanyń jalpy aǵyny 4,2 mlrd dollarǵa jetti. Elimizde mashına jasaý, energetıka, agrohımııa, farmasevtıka, azyq-túlik ónerkásibi sııaqty basqa da salalarda eýropalyq kapıtaldyń qatysýymen 4 myńnan astam kásiporyn jumys isteıdi. Olardyń arasynda «Alstom», «Claas», «Carlsberg», «Polpharma» men basqa da birqatar kompanııa bar.
Oljas Bektenov eýropalyq áriptestermen ózara is-qımyldy tereńdetýge múddeli ekenin atap ótti.
«Memleket basshysy Qasym-Jomart Toqaev óziniń halyqqa Joldaýynda ınvestısııalyq saıasatty jetildirýge erekshe kóńil bóldi. Biz ekonomıkaǵa uzaqmerzimdi ınvestısııa tartýǵa qolaıly jaǵdaı jasaý úshin jumys istep jatyrmyz. Eýropalyq bıznestiń Qazaqstandaǵy qatysýyn keńeıtý úshin ári óndiristi lokalızasııalaý maqsatynda jańa birlesken jobalardy júzege asyrýǵa shaqyramyn», dedi O.Bektenov.
Bıylǵy 10 aıda elimizdiń negizgi kapıtalyna salynǵan ınvestısııa 13,1%-ǵa ósip, 16 trln teńgege jetti.
El Úkimeti ınvestorlardyń múddelerin qorǵaýǵa, bızneske qoldaý kórsetýge kepildik beretin quqyqtyq, ınstıtýsıonaldyq negizderdi josparly túrde nyǵaıtyp keledi. Bızneske arnalǵan ákimshilik talaptardy jeńildetý sharalary aıasynda esep berý túrleriniń jartysyna jýyǵy joıyldy. EgovBusiness veb-portaly men mobıldi qosymsha arqyly ınvestorlarǵa barlyq memlekettik qyzmetter men qoldaý sharalary «bir tereze» qaǵıdaty boıynsha usynylyp otyr. Jalpy, memlekettik qyzmetterdiń 90%-dan astamy onlaın-formatqa aýystyrylǵan.
Jańa Salyq kodeksinde ınvestorlar úshin salyqtyq jeńildikter, kedendik baj salyqtarynan bosatý, zattaı granttar berý men basqa da jeńildikter túrindegi ıkemdi preferensııalar saqtalǵan. Bızneske ınfraqurylym boıynsha qoldaý arnaıy ekonomıkalyq, ındýstrııalyq, shaǵyn ónerkásiptik aımaqtarda daıyn óndiris alańdaryn usyný túrinde kórsetiledi.
Jıynda EO elshisi Aleshka Sımkıch, Germanııa elshisi Monıka Iversen, Nıderland elshisi Nıko Shermers, Fransııa elshisi Sılvan Gıoge, Shvesııa elshisi Stefan Erıksson, Qazaqstannyń Eýropalyq bıznes qaýymdastyǵynyń tóraǵasy Erlan Dosymbekov, Glovo Qazaqstan (Ispanııa) bas menedjeri Laýra Martın Alkaras usynystary men usynymdaryn aıtty. Bıznes júrgizý men damytý sharttary, boljamdy salyq saıasaty men zań ústemdigine qatysty jáne taǵy da basqa máseleler kóterildi.
Eýropalyq odaq elshisi Aleshka Sımkıch elimiz eýropalyq ınvestorlarǵa Ortalyq Azııadaǵy negizgi baǵyt ekenin atap ótti. Yntymaqtastyqtyń keleshegi zor baǵyttary retinde energetıka, sıfrlyq kommýnıkasııalar men JI, kólik, densaýlyq saqtaý, aýyl sharýashylyǵy, sý resýrstaryn basqarý sııaqty basqa da salalar ataldy.
«Qazaqstan WEF jahandyq básekege qabilettilik ındeksi sııaqty reıtıngterdegi óz ustanymyn jaqsarta túsken. Investısııaǵa qatysty birqatar negizgi kórsetkish boıynsha Qazaqstan óńirde kósh bastap tur. Investorlar jaǵdaıyn odan ári jaqsartý bolashaqta úlken paıda ákelýi múmkin», dedi Nıderland elshisi Nıko Shermers.
Fransııa elshisi Sılvan Gıoge ınvestorlarǵa senimdi quqyqtyq baza qalyptastyryp otyrǵan memlekettik deńgeıdegi reformalarǵa baılanysty fransýz kompanııalary el naryǵyna úlken qyzyǵýshylyq tanytyp otyrǵanyn aıtty. Shvesııa elshisi Stefan Erıksson elimizdegi sıfrlyq transformasııanyń mańyzdylyǵyn atap ótip, shved kompanııalarynyń jasandy ıntellekt tehnologııalaryn engizý salasynda tájirıbe almasýǵa múddeli ekenin jetkizdi.
Otyrys qorytyndysy boıynsha qatysýshylar Qazaqstan men EO arasyndaǵy saýda-ekonomıkalyq qatynastardy damytýǵa ári ınvestısııalyq baılanystardy jandandyrýǵa jan-jaqty yqpal etýge daıyn ekenderin jetkizdi. Premer-mınıstr memlekettik organdar men uıymdarǵa jıynda aıtylǵan máseleler men usynymdardyń barlyǵyn pysyqtaýdy tapsyrdy.
