foto: Ulttyq ekonomıka mınıstrligi
«Investısııaǵa tapsyrys» – halyq arasynda suranysqa ıe, kóbi ımportqa shyǵarylatyn taýarlardy óndirý úshin ShOB jáne jeke sektordaǵy iri bıznestiń ınvestısııalyq jobalaryn qoldaýǵa arnalǵan memlekettik jańa baǵdarlama. Bul – negizinen AО́K jáne óńdeý ónerkásibi salasynyń tutyný taýarlary. Memleket ımportty almastyrý jáne eksportqa taýar óndirý áleýeti joǵary perspektıvalyq salalardy, al óńirler olardy júzege asyrýǵa qabiletti naqty jobalar men bıznesti aıqyndaıdy. Jobalardyń tıimdiligin taldaý jáne olardy qarjylandyrý «Báıterek» holdınginiń quraldary men tetikteri arqyly júrgizilmek.
«Oblystar men respýblıkalyq mańyzy bar qalalardyń ákimdikterimen birlesip, óńirlerdiń óndiristik áleýetine taldaý júrgizildi. AО́K jobalary boıynsha ınvestısııalyq portfel qalyptastyrylyp, oǵan jalpy quny 4,3 trln teńgeni quraıtyn 202 joba endi», dedi aýyl sharýashylyǵy vıse-mınıstri Ermek Kenjehanuly.
AО́K salasynyń «Investısııaǵa tapsyrys» sheńberindegi jobalar pýlyna taýarly sút fermalaryn salýdy jalǵastyrý, etti mal sharýashylyǵy men qus sharýashylyǵyn damytý, sút, et, teri jáne jún óńdeý, jylyjaı salý, kókónis, jemis-jıdek pen kartopty qaıta óńdeý, qant ónerkásibi men astyqty tereń óńdeýdi damytý, balyq óńdeý kásiporyndaryn qurý kiredi. Osylaısha, «Investısııaǵa tapsyrys» naqty jobalarǵa jáne árbir sala tıimdiligine nazar aýdara otyryp, elimizdiń ımportqa táýeldiligin tómendetý boıynsha burynǵy memlekettik baǵdarlamalardy júzege asyrýdyń jalǵasyna aınalady.
Atap aıtqanda, qant ımportyna táýeldilikti tómendetý úshin «QAZAQARAB SUGAR» JShS jáne «Asyl Farms» JShS qant óndirý boıynsha 5 joba josparlanyp otyr. Qus eti boıynsha – 24 joba ( «AITAS KZ» AQ, «Eco Broiler Ltd» JShS jáne basqalary), shujyq ónimderin óndirý boıynsha – «STERH» JShS jáne «S-Bolashaq» ÁKK-tiń 3 jobasy. Astyqty tereń óńdeý boıynsha «Tiryaki Holding» túrik kompanııasy Astanada astyq jáne burshaq daqylyn tereń óńdeý boıynsha ıntegrasııalanǵan agroónerkásip keshenin salý jobasyn júzege asyrýda. О́ńdeý qýaty – 240 myń tonna bıdaı men 80 myń tonna burshaq. Jobanyń quny – $320 mln, júzege asyrý merzimi – 2028 jylǵa deıin.
О́nerkásip jáne qurylys vıse-mınıstri Oljas Saparbekov ımportqa táýeldiligi joǵary tutyný taýarlarynyń 26 túriniń tizbesin usyndy. Olardyń qatarynda maqta matalar, mektep formasy, aıaq kıim, santehnıka, turmystyq tehnıka, kosmetıka jáne gıgıena quraldary bar. Osy baǵyttar boıynsha 10 myńǵa jýyq jumys ornyn asha otyryp, 600 mlrd teńgeden astam somaǵa 67 ınvestısııalyq jobadan turatyn portfel qalyptastyryldy. Negizgi bastamalardyń qatarynda Túrkistan oblysynda maqta matalar óndirisi, Qyzylorda oblysynda santehnıka, Qaraǵandy oblysynda jylý oqshaýlaǵysh materıaldar, Soltústik Qazaqstan oblysynda DSP jáne LDSP óndirisi bar.
Jeńil ónerkásipti yntalandyrý úshin salyqtyq jeńildikti qoldaný boıynsha usynystar talqylandy. Barlyq joba ekonomıkalyq oryndylyǵy men ınvestısııalyq tartymdylyǵyn baǵalaý úshin «Báıterek» holdınginiń jelisi boıynsha saraptamadan ótedi. Qarjylandyrý Holdıngtiń enshiles uıymdary jáne qajet bolǵan jaǵdaıda ekinshi deńgeıli bankter arqyly júzege asyrylady.
Investorlardy irikteý qarjylyq turaqtylyq, salalyq tájirıbe jáne óndiristi lokalızasııalaý deńgeıin eskere otyryp júrgiziledi.
Qorytyndylaı kele, Serik Jumanǵarın memlekettik organdarǵa baǵdarlamany iske qosý úshin barlyq uıymdastyrýshylyq-quqyqtyq rásimderdi jyldam aıaqtaýdy, sondaı-aq óńirlermen jáne bıznespen birlesip, naqty jobalardy belsendi pysyqtaýdy tapsyrdy.
«Baǵdarlamanyń máni qarapaıym jáne túsinikti. Biz jazdan bastap onyń barlyq baǵytyn pysyqtaýdamyz. Qazir praktıkalyq iske asyrý kezeńi júrip jatyr. Soltústik Qazaqstan oblysynyń taýarly sút fermalaryn salý boıynsha tájirıbesin taratý jobasy bastalǵan kezde kópshilik kúmándanǵan bolatyn. Al qazir barlyǵy qarjylandyrý suraıdy. Biraq resýrstar shekteýli – qarajat naqty jumys júrgizilip jatqan jáne ómirsheń jobalar bar aımaqtarǵa bólinedi», vıse-premer.
