Foto: Astana ákimdigi
Aqyldy robot jobasyn kópshilikke tanystyrǵan – Astanadaǵy Álimhan Ermekov atyndaǵy № 38 mektep-lıseıiniń 7-synyp oqýshysy Shahnazar Kamalov.
Ákimdiktiń málimetinshe, joba – LEGO Mindstorms EV3 konstrýktory negizinde qurastyrylǵan.
«Baǵdarlamalaý EV3 Classroom platformasynda Python tilinde júzege asyrylǵan. Bul oqýshyǵa algorıtmdik oılaý daǵdylaryn damytýǵa, ınjenerlik esepterdi sheshýge, sondaı-aq robot qozǵalysynyń ár buryshy men aınalýyn dáldikpen basqarýǵa múmkindik bergen», delingen ákimdik taratqan habarlamada.
Robototehnıka – jasandy ıntellekt pen ınjenerııa toǵysqan, qarqyndy damyp kele jatqan mańyzdy baǵyttardyń biri. Osyndaı jobalar oqýshylardyń tehnıkalyq saýattylyǵyn arttyryp qana qoımaı, olardyń shyǵarmashylyq qabiletin shyńdap, ǵylym men tehnologııaǵa degen qyzyǵýshylyǵyn kúsheıtedi.
