Forýmǵa qatysýshylar aldymen «MetalFormer» JShS óndiris alańyna bardy. Olar zamanaýı jabdyqtalǵan jelilerdiń jumysymen tanysyp, óndiris barysynyń ár kezeńin baqylap, shatyr men qaptama materıaldarynyń jasalý tehnologııasyn, bólshekterdi daıyndaý men óńdeý qadamdaryn qadaǵalap kórdi. Sonymen qatar stýdentter óndiris oryndarynda qaýipsizdik talaptary, eńbek mádenıeti, kásibı daǵdylardyń mańyzy týraly aqparat aldy. Qatysýshylar ásirese «Knauf», «TP-Link», «GROHE» sııaqty halyqaralyq brendterdiń resýrs ortalyqtaryna qyzyǵýshylyq tanytty. Onda mehatronıka, jelilik ákimshilendirý, telekommýnıkasııalar, «aqyldy úı» tehnologııalary boıynsha oqý zerthanalary tanystyryldy. «FESTO» aımaqtyq ortalyǵy stýdentterge ónerkásiptik avtomatıka jumysyn kórsetý arqyly sıfrlyq óndiris dáýirinde bilikti maman qalyptastyrýdyń mańyzdy daǵdylaryn úıretti. Bul tájirıbe olarǵa tek óndiris barysyn ǵana emes, bolashaqta kásibı tehnıkalyq maman retinde qalyptasýdyń mańyzyn túsindirdi.
Ekskýrsııadan keıin Polıtehnıkalyq kolledjde dıalog alańy uıymdastyryldy. Is-sharaǵa memlekettik organdardyń, iri kompanııalardyń, jastar uıymdarynyń ókilderi qatysty. Qatysýshylar tájirıbeli mamandarmen tikeleı sóılesip, ınjenerlik jáne óndiristik baǵyttardaǵy mansap múmkindigi týraly jan-jaqty surap bildi. Sonymen qatar stýdentter qazirgi eńbek naryǵyndaǵy talaptar, kompanııalarda bolyp jatqan tehnologııalyq jańalyqtar men jas mamandar úshin mańyzdy kásibı daǵdylar týraly suraqtaryna jaýap aldy. Atap aıtsaq, «Jastar rýhy» jastar qanatynyń tóraǵasy Aqerke Eskendirova, «BI Group» damý dırektory Beksultan Oljabaı, «QazaqGaz» ulttyq kompanııasynyń tehnıkalyq dırektory Ýálıhan Qymbatov, Astana qalasy Energetıka basqarmasynyń orynbasary Maqsat Esmaǵulov sóz sóıledi.
«Jastar rýhy» jastar qanatynyń tóraǵasy Aqerke Eskendirova jumysshy mamandyqtaryn damytý ulttyq deńgeıdegi basym baǵyt ekenin atap ótti. Ol jastardyń tehnıkalyq jáne óndiristik salalarda sapaly bilim alýyna memleket tarapynan jasalyp jatqan naqty múmkindigine toqtaldy.
«Memleket basshysy Qasym-Jomart Toqaev 2025 jyldy Jumysshy mamandyqtary jyly dep jarııalady. Bul elimizdiń turaqty damýy úshin bilikti kadrlardy daıarlaýdyń mańyzyn kórsetedi. Búginde jastardyń tehnıkalyq daǵdylardy meńgerip, eńbek naryǵyna senimdi kirýi úshin kóp múmkindik jasalyp jatyr. Mundaı bastamalar kásibı biliktilikti arttyrýmen ǵana shektelmeı, jastardyń shyǵarmashylyq oılaý qabiletin, jaýapkershilik sezimin jáne praktıkalyq daǵdylaryn qalyptastyrýǵa septigin tıgizedi. Sonymen qatar jastardyń óndiris oryndarynda tájirıbe jınaýy, iri kompanııalarmen tikeleı baılanys ornatýy olardyń mansabyn ósiredi», dedi ol.
Pikirtalas barysynda «BI Group» kompanııasynyń damý jónindegi dırektory Beksultan Oljabaı sóz alyp, qurylys salasyndaǵy jas tehnıkalyq mamandarǵa degen suranystyń artqanyn aıtty.
«Qazirgi tańda qurylys ındýstrııasynda bilikti jas kadrlarǵa qajettilik kúnnen-kúnge artyp keledi. Kompanııalar teorııalyq bilimge ǵana emes, naqty óndiristik tájirıbesi bar mamandarǵa basymdyq beredi. Sondyqtan jastardyń oqý barysynda praktıkalyq daǵdylaryn jetildirýi óte mańyzdy. Jastar uıymdarymen birlesken jobalar arqyly stýdentter óndiris barysyn óz kózimen kórip, tájirıbe jınaı alady. Bul bolashaqta olardyń kásibı mansabyn jyldam bastaýǵa múmkindik beredi. Biz jas kadrlardy oqytyp qana qoımaı, olardy naqty jobalarǵa tartý arqyly da qoldaýdy maqsat etemiz», dedi ol.
Energetıka mamandyǵynyń ekinshi kýrs stýdenti jas mamandardyń jumysqa ornalasý jáne tájirıbe jınaqtaý múmkindigi týraly suraq qoıdy: «Men energetıka fakýltetiniń 2-kýrs stýdentimin. Bolashaqta óz mamandyǵym boıynsha jumys istegim keledi. Búginde jas mamandar úshin qandaı múmkindik bar jáne oqý kezinde mansapty bastaýǵa bola ma?» dep surady forýmǵa qatysýshy. Bul suraqqa Astana qalasy Energetıka basqarmasy basshysynyń orynbasary Maqsat Qaıyrkeshuly jaýap berdi. Ol aldymen elordada energetıkalyq ınfraqurylymdy jańǵyrtýǵa baǵyttalǵan iri jobalardyń júzege asyrylyp jatqanyn atap ótti.
«Bul jobalar jas ınjenerlerge suranystyń joǵary ekenin kórsetedi. Elordadaǵy energetıkalyq sektorda mamandarǵa degen qajettilik artyp otyr. Qazirgi kezde stýdentterge óndiristik tájirıbeden ótý, salalyq jobalarǵa qatysý, mamandyq boıynsha jumysqa ornalasý múmkindigi qarastyrylǵan. Belsendilik tanytqan stýdentter oqyp júrip-aq kásibı jolyn bastaı alady. Tájirıbeden ótken jastar eńbek naryǵynda básekege qabiletti maman retinde qalyptasady», dedi ol.
Qalalyq máslıhat depýtaty, «Jastar rýhy» Astana qalalyq fılıalynyń tóraǵasy Arslanbek Maǵzum forýmnyń mańyzyn atap ótip, mundaı alańdardyń jastarǵa bilimmen shektelmeı, eńbek naryǵyndaǵy ózgerister men qazirgi zamanǵy talaptardy túsinýge kómektesetinin aıtty.
«Biz jastarǵa óndiristi óz kózderimen kórsetýge tyrysamyz. Qalaı uıymdastyrylǵanyn, qandaı jumystar júretinin, damýdyń qandaı keleshegi bar ekenin kórsetý mańyzdy. Búgingi stýdentter erteń ulttyq jáne jeke kompanııalarda jumys isteıtin bolady. Jastar óz qabiletin kórsete otyryp, kásibı ósýge, mansap jolyn senimdi bastaýǵa múmkindik alady. Mundaı tájirıbeler olarǵa teorııalyq bilimmen shektelmeı, óndiristi túsinýge, zamanaýı tehnologııalarmen tanysýǵa, bolashaq maman retinde qajetti daǵdylardy qalyptastyrýǵa kómektesedi. Forýmǵa qatysqan jas basshylar elimizde talantty bolsań, kez kelgen salada joǵary satyǵa kóterilýge bolatynyn dáleldep otyr. Bul jastarǵa senim beredi dep oılaımyn», dedi depýtat.
Uıymdastyrýshylardyń aıtýynsha, mundaı kezdesýler aldaǵy ýaqytta turaqty ótkizilip, jastardyń jumys berýshilermen tikeleı baılanys ornatýyna, óndiris oryndaryn aralaýyna, mamandyq tańdaý boıynsha naqty keńes alýyna múmkindik jasalatyn bolady. Forým jastardyń jumysshy mamandyqtaryna degen qyzyǵýshylyǵyn arttyryp, bul baǵyttyń turaqtylyqty qamtamasyz etetin ǵana emes, sonymen qatar naqty kásibı órleýge múmkindik beretinin kórsetti. Sondaı-aq is-shara stýdentterge ınjenerlik jáne tehnıkalyq salalardaǵy bilikti maman bolýǵa baǵyt siltep, jastardy qoldaýǵa daıyn iri kompanııalarmen baılanys ornatýǵa septigin tıgizdi.
