Foto: ru.wikipedia.org
BILD basylymynyń habarlaýynsha, Leıpsıgtegi Bah muraǵatynyń mamandary eki organdyq pesany kompozıtordyń erte kezeńdegi týyndylary dep rastap otyr. Bul týraly muraǵat dırektory Peter Vollnı málimdedi.
Shyǵarmalar alǵash ret Bah ómirden ótken 275 jyldan keıin shyrqaldy. Olardy mýzykant uzaq jyl eńbek etken Leıpsıgtegi Áýlıe Foma shirkeýinde sheberler oryndady. Premerany álemniń túkpir-túkpirindegi myńdaǵan tyńdarman tikeleı efırden tamashalaǵan. Germanııanyń mádenıet mınıstri Volfram Vaımer bul jańalyqty «mýzyka álemi úshin juldyzdy sát jáne jahandyq sensasııa» dep baǵalady.
Rýkopıster alǵash ret 1990-jyldary tabylǵanymen, olardyń avtorlyǵy uzaq ýaqyt boıy belgisiz bolyp kelgen. Tek byltyr Peter Vollnı olardy Bahtyń az tanymal shákirti Salomon Gıýnter Ionnyń kóshirgenin anyqtap, týyndylardy kompozıtordyń Arnshtadttaǵy erte kezeńimen baılanystyrdy. Dál osy jerde 18 jastaǵy Bah organıst bolyp qyzmet atqarǵan.
