Mınıstr atap ótkendeı, halyqtyń tabysyn qoldaýǵa baǵyttalǵan jumysty jalǵastyrý josparlanyp otyr. Ekonomıkalyq belsendiligi tómen óńirlerge erekshe kóńil bólinedi, áleýmettik tólemderdiń ashyqtyǵy men ataýlylyq baǵytyn arttyrý sharalary qabyldanady. Sonymen qatar sıfrlyq tehnologııalardy paıdalaný arqyly áleýmettik qoldaýdyń tıimdiligin arttyrý kózdelgen.
«2027-2028 jyldary eń tómengi jalaqyny kóterý máselesi qaralady. 2026-2028 jyldary halyqtyń naqty tabysynyń ósýi jylyna orta eseppen 2-3 paıyzdan tómen emes bolady», dedi Serik Jumanǵarın.
Mınıstr Úkimet kvazımemlekettik sektordy ońtaılandyrý boıynsha jumysty jalǵastyratynyn da málimdedi. 2026 jyldyń sońyna deıin kvazımemlekettik sektor sýbektterin qurýǵa moratorıı qoldanylady.
«Bıyl Jekeshelendirýdiń 2021-2025 jyldarǵa arnalǵan keshendi josparyn iske asyrý aıaqtalýda. Odan ári ońtaılandyrýǵa usynylatyn memlekettik obektilerdiń jańa tizbesi qalyptastyryldy. Oǵan balanstyq quny 2 trln teńgeden asatyn 500-ge jýyq kompanııa kirdi. Ońtaılandyrý úsh kezeńde júzege asyrylady. Budan basqa, «Kazaqtelekom» aksıonerlik qoǵamy men «Qazaq Green Power PLC» aksııalaryn IPO/SPO-ǵa shyǵarý josparlanyp otyr», dedi vıse-premer.
Serik Jumanǵarın makroekonomıkalyq turaqtylyqty qamtamasyz etý úshin Úkimet pen Ulttyq banktiń aqsha-kredıt jáne salyq-bıýdjet saıasatyn úılestirýdi jalǵastyratynyn aıtty.
«Baǵdarlamany iske asyrýdyń basty nátıjesi halyqtyń naqty tabysynyń ósýi bolýy tıis. Jalpy, baǵdarlamany iske asyrý ekonomıkanyń turaqtylyǵyn arttyrýǵa, qarjylyq ornyqtylyqty nyǵaıtýǵa jáne orta merzimdi perspektıvada turaqty jáne sapaly ósý úshin jaǵdaı jasaýǵa múmkindik beredi», dep túıindedi mınıstr.
