Foto: Joǵarǵy Sot
Anasy balanyń qolyn baılap, úıde ony jalǵyz qaldyryp, ózi ketip qalǵan. Balanyń uzaq jylap jatqanyn estigen kórshiler esiktiń sańylaýy arqyly qaraýsyz qalǵan balany kórgen. Qoly baılaýly bala jylap, bólmeni aınalyp júgirip júrgen. Sodan keıin kórshiler jedel járdem shaqyrǵan.
«Sarapshylar balanyń kógergen jerlerin densaýlyqqa jeńil zııan retinde baǵalady. Sonymen qatar balada psıhıkalyq jáne sóıleý damýynyń tejelýi, JRVI, salmaq jetispeýshiligi jáne pedagogıkalyq qaraýsyzdyq belgileri anyqtalǵan», dep habarlady Qaraǵandy oblystyq sotynyń baspasóz qyzmeti.
Keıin kórshilerdiń shaǵymy boıynsha bala Balalardy qoldaý ortalyǵyna ornalastyryldy.
«Áıel ata-analyq mindetterin oryndamaǵany jáne kámeletke tolmaǵan balaǵa qatygezdik kórsetkeni úshin kináli dep tanyldy (QK-niń 140-babynyń 2-bóligi). Qaraǵandy oblysynyń kámeletke tolmaǵandardyń isteri jónindegi mamandandyrylǵan aýdanaralyq soty balanyń aýyr hali anasymen birge turǵan kezinde paıda bolǵanyn anyqtady», delingen habarlamada.
Sotta anasy balasyn jalǵyz qaldyryp, onyń qolyn baılaý arqyly oǵan naqty qaýip tóndirgenin atap ótti. Qorǵanshylyq jáne qamqorshylyq organdary balanyń múddelerine sáıkes keletin qorytyndy usyndy.
«Osy mán-jaılar boıynsha sot balanyń ákesiniń talaptaryn tolyǵymen qanaǵattandyrdy. Balanyń anasynyń ata-ana quqyqtary shekteldi. Al balanyń turǵylyqty jeri ákesimen birge bolýy anyqtaldy. Anasyna alıment tóleý mindetteldi, al ákesi ony tóleýden bosatyldy», dep jazylǵan sot habarlamasynda.
Keıinnen ákesi ulyn óziniń ata-anasymen birge turatyn alty bólmeli jaıly jeke úıine aparǵan. Qazir bala ákesimen jáne ata-ájesimen birge turady.
