Senbi kúni Premer-Mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken ınflıasııany turaqtandyrý jónindegi jıynda áleýmettik mańyzy bar taýarlar tizbesin keńeıtýge qatysty azyq-túlik sebetine júrgizilgen aldyn ala taldaý tanystyryldy.
Qarashanyń úshinshi aptasynda áleýmettik mańyzy bar azyq-túlik baǵasy ózgerissiz qaldy. Saýda jáne ıntegrasııa birinshi vıse-mınıstri Aıjan Bıjanovanyń aıtýynsha, qazan aıynda ınflıasııaǵa eń úlken úles qosqan taýarlar mynalar boldy: qyzanaq – 15,8%, tartylǵan et – 3%, súıeksiz sıyr eti – 2,2%, súıekti jylqy eti – 1,5%, qııar – 7,4%, balyq – 2,6%, banan – 2,8%. Alaıda byltyrdyń osy kezeńimen salystyrǵanda, qyzanaq 36,6%-ǵa, qııar 43,4%-ǵa arzandaǵan.
– Inflıasııaǵa barlyq óńirler boıynsha júrgizilgen taldaý qorytyndysy TOP-30 taýardy anyqtady. Olar baǵanyń ósýine eń kóp yqpal etedi, biraq áleýmettik mańyzy bar ónimder tizimine kirmeıdi. Bul – et túrleri, balyq, alma, almurt, lımon, shaı, syr, qaqtalǵan skýmbrııa, banan, qyzanaq, qııar jáne ózge de taýarlar. Olardyń ishinde ımporty joǵary ónimder de, negizinen aılyq ınflıasııaǵa ǵana áser etetinderi de bar. Osy tizimnen áleýetti túrde áleýmettik mańyzy bar taýarlar qataryna ene alatyn 23 pozısııany iriktedik. Endi bul usynystardy bıznes ókilderimen talqylaımyz, – dedi Aıjan Bıjanova.
Kásipkerler úshin tizimniń keńeıýi birqatar mindettemeni bildiredi: mámilelerdiń ashyqtyǵyn qamtamasyz etý, kelisimsharttardy rásimdeý, shot-faktýralar men fıskaldyq chekterdi rásimdeý, sondaı-aq zańda belgilengen 15%-dan aspaıtyn saýda ústemesin saqtaý.
Bul sharalar keń tutynylatyn azyq-túliktiń aınalymyn ashyq etýge jáne deldaldardyń negizsiz yqpalyn shekteýge baǵyttalǵan.
Jıyn qorytyndysynda Serik Jumanǵarın Saýda jáne ıntegrasııa mınıstrligine bıznes qaýymdastyqpen, salalyq birlestiktermen, «Atameken» UKP-men ár usynylǵan pozısııany talqylaýdy, ımport qurylymyn qosymsha zerdeleýdi tapsyrdy. Barlyq konsýltasııalar aıaqtalǵannan keıin ǵana túpkilikti sheshim qabyldanady.
