Fotolar: Jambyl oblysy ákimdigi
«Búgin – biz úshin tarıhı ári qýanyshty kún. Áýlıe-Ata jerinde jańa fýtbol dáýiriniń bastalýyn birge atap otyrmyz.
Salynatyn bul nysan – tek ǵımarat qana emes, bolashaq chempıondardyń ordasy, el namysyn álemdik arenalarda abyroımen qorǵaıtyn jańa býyn fýtbolshylardyń jolyn ashatyn mańyzdy qadam.
Bizdiń óńir – qazaq fýtbolynyń qaınar bulaǵy. Osynda ósip, talaı jankúıerdiń júregin jaýlaǵan dańqty sportshylardyń esimi biz úshin zor maqtanysh, keıingi tolqynǵa úlgi.
Búgin kapsýlany saltanatty túrde ornalastyrý – alda kútken úlken jetistikterdiń nyshany. Bul akademııadan el senimin arqalaıtyn daryndy, talapty jas fýtbolshylar ósip shyǵatynyna kámil senemiz.
Jańa akademııa qazaq fýtbolyna tyń serpin berip, bizdi jańa belesterge bastaı bersin!», dedi Erbol Qarashókeev.
Fýtbol federasııasynyń Bas hatshysy Davıd Lorııa jáne «Halyk» qaıyrymdylyq qorynyń atqarýshy dırektory Ǵalymbek Jaqsylyqov jańa akademııanyń qazaq fýtbolyn damytýdaǵy róline toqtalsa, fýtbol ardageri Georgıı Hýtıdı men «Taraz» fýtbol klýbynyń túlegi, belgili fýtbolshy Nurken Mázbaev jobany iske asyrýǵa atsalysyp júrgen azamattarǵa óz alǵystaryn bildirdi.
Fýtbol akademııasy 2027 jyly paıdalanýǵa beriledi
О́ńir ákimdiginiń málimetinshe, quny shamamen 3,5 mlrd teńgeni quraıtyn fýtbol akademııasynda jasóspirimderdiń kásibı ósýi men damýyna erekshe nazar aýdarylady. Bul úshin zamanaýı materıaldyq baza jasaqtalyp, tájirıbeli jattyqtyrýshylar jumys isteıdi, al oqý-jattyǵý prosesinde ǵylymı negizdelgen ádistemeler qoldanylmaq.
Jas fýtbolshylardyń jaıly ómir súrýi úshin 100 oryndyq jataqhana salý josparlanyp otyr.
Akademııa 2027 jyly paıdalanýǵa beriledi dep kútilip otyr.
Aıta ketelik, joba Qazaqstan fýtbol federasııasy, «Halyk» qaıyrymdylyq qory jáne Jambyl oblysy ákimdigi arasyndaǵy seriktestik sheńberinde júzege asyrylyp jatyr.
