Negizgi basqosýlar Shonjy aýylynyń mádenıet úıinde, sondaı-aq aýdannyń ózge de alańdarynda uıymdastyryldy. Baǵdarlamanyń basty maqsaty – Uıǵyr aýdanynyń rýhanı áleýetin ilgeriletý, ulttyq qundylyqtardy dáripteý, ǵylym men shyǵarmashylyqty qoldaý jáne ósip kele jatqan urpaqqa durys baǵyt-baǵdar berý boldy.
Forýmdar aıasynda bilim berý júıesiniń jetistikteri men ǵylymı zertteýlerge arnalǵan pikirtalas alańdary jumys istedi. Qazaqstanda jáne shetelde bilim alyp júrgen jas ǵalymdardyń qatysýymen plenarlyq otyrystar ótti. Qonaqtarǵa bilim berý uıymdarynyń kórmeleri usynylyp, jetekshi professorlar men ǵalymdar mazmundy baıandamalar jasady. Sonymen qatar, 9–11 synyp oqýshylaryna arnalǵan tanymdyq jáne kásibı baǵyttaǵy seksııalar uıymdastyryldy.
Ádebıet pen mádenıet kúni aıasynda aýdannan shyqqan aqyndar, jazýshylar, akterler men óner qaıratkerleriniń qatysýymen shyǵarmashylyq kezdesý ótti. Jıynda ulttyq rýh, ónerdiń qoǵamdyq damýdaǵy róli jáne urpaqtar sabaqtastyǵy máseleleri sóz boldy.
Sport pen densaýlyq kúnine arnalǵan is-sharalarda dzıýdo, boks jáne qazaq kúresi boıynsha sheberlik sabaqtary men kórsetilimder uıymdastyryldy. Jas sportshylar tálimgerlermen jáne qoǵam qaıratkerlerimen kezdesip, olardyń ómirlik tájirıbesi men motıvasııalyq keńesterin tyńdady. Ashyq sport alańdarynda turǵyndarǵa arnalǵan jattyǵýlar ótkizildi, bul óz kezeginde salaýatty ómir saltyn nasıhattaýǵa yqpal etti.
Aýyl sharýashylyǵy men kásipkerlik kúni áıelderdiń bıznes pen aýyldyq bastamalardy damytýdaǵy róline arnaldy. Forýmǵa qatysýshy áıelder kásipkerliktiń múmkindikterin, ekonomıkalyq belsendilikti arttyrý máselelerin jáne qoǵamdyq ómirdegi áıelderdiń áleýmettik mańyzyn talqylady. Osy kúni marapattaý rásimderi ótip, otandyq taýar óndirýshilerdiń kórmesi uıymdastyryldy.
Forýmdardyń qorytyndy serııasynda qonaqtarǵa «Mádenıet – ult aınasy» atty kórme usynylyp, «Tarıh paraqtaryndaǵy 90 jyl» atty derekti fılm kórsetildi. Aýdannyń bolashaq damý modeline arnalǵan jasandy ıntellekt AiSharyn ázirlegen sıfrlyq joba kópshiliktiń erekshe qyzyǵýshylyǵyn týdyrdy. Merekelik baǵdarlama «Sharyn – shattyq mekeni» atty konsertpen aıaqtaldy.
Bes kúnge sozylǵan aýqymdy baǵdarlama Qaradala óńiriniń mádenı murasyn, qazirgi áleýetin jáne birlik, jańarý men jasampazdyqqa negizdelgen damý umtylysyn keńinen tanytqan mańyzdy oqıǵa boldy.
Almaty oblysy.
