Energyprom derekterine súıensek, 2025 jyldyń qańtar-qazan aılaryndaǵy jalpy óndiristiń jartysynan astamy Almaty qalasyna (24,6 mlrd tg), Almaty oblysyna (22,3 mlrd tg) jáne Túrkistan oblysyna (16,4 mlrd tg) tıesili. Aıta keterligi, Almaty oblysynda jıhaz óndirisi 2024 jyldyń qańtar-qazanymen salystyrǵanda 2,1 ese artqan.
Mysaly, ótken jylmen salystyrǵanda aǵashtan jasalǵan keńse jıhazy óndirisi birden 41,8%-ǵa ósken (353,5 myń danaǵa deıin). Sondaı-aq ashana men qonaq bólmege arnalǵan aǵash jıhaz óndirisi 24,5%-ǵa (97,5 myń danaǵa deıin) jáne metall qańqaly arnaıy otyrǵysh jıhazy 5%-ǵa (995,1 myń danaǵa deıin) ósti.
Sonymen qatar jatyn bólme úshin (tósek pen shkaftan basqa) aǵash jıhaz óndirisi eki esege qysqaryp, 14 myń danany ǵana qurady, al asúı jıhazy óndirisi 8,3%-ǵa azaıyp, 107,4 myń dana boldy.
Otandyq jıhaz fabrıkalary 2025 jyldyń qańtar-qyrkúıeginde asúı jáne aǵash keńse jıhazyna degen suranysty (ishki naryqtaǵy satý jáne eksport) tıisinshe 71% jáne 83,1% kóleminde qamtamasyz etken. Asúı jıhazy ımporty ótken jylmen salystyrǵanda tómendep, aǵash keńse jıhazy ımporty 25%-ǵa azaıdy. Alaıda ishki naryqtaǵy asúı jıhazy satylymy bir jylda 18,3%-ǵa tómendep, 135,9 myń danany qurasa, kerisinshe aǵash keńse jıhazy satylymy 25,2%-ǵa ósip, 382,4 myń danaǵa jetti.
Saýda kásiporyndaryna arnalǵan aǵash jıhaz segmentinde otandyq fabrıkalardyń úlesi aıtarlyqtaı qysqardy. Bıylǵy qańtar-qyrkúıekte el óndirýshileri suranysty nebári 7,4% kóleminde qamtamasyz etse, bul kórsetkish 2024 jyldyń osyndaı kezeńinde 70,6% bolǵan. Import kólemi birden 18,8 esege ósip, 244,6 myń danany qurady, al ishki naryqtaǵy satylym alty ese artyp, 263,7 myń danaǵa jetti.
Ashana jáne qonaq bólme jıhazyna degen suranysty otandyq kásiporyndar 18,6% deńgeıinde qamtamasyz etti (byltyr – 13,6%). Osy sanattaǵy ımport 11,7%-ǵa tómendep, 387,6 myń dana boldy. Naryqtaǵy satylym kólemi de azaıyp, 6,5%-ǵa kemip, 474,1 myń danany qurady.
2025 jyldyń qazan aıynyń qorytyndysy boıynsha jıhaz jáne úıge qajetti buıymdar baǵasy bir aıda 0,3%-ǵa, bir jylda 8,2%-ǵa qymbattady. Eń eleýli qymbattaǵan jıhaz túrleri – jatyn bólme jıhazdary jáne dıvan-tósekter.
