Memleket basshysynyń tapsyrmasyn oryndaý aıasynda Qyzylorda oblysy aýmaǵynda ornalasqan respýblıkalyq mańyzy bar Qyzylorda – Jezqazǵan avtojolynyń jańartylǵan bóliginde negizgi jumystar tolyq aıaqtalyp, kólik qozǵalysy ashyldy. Uzyndyǵy 216 shaqyrym bolatyn ýchaskeniń 192 shaqyrymy qaıta jańǵyrtýdan, al 24 shaqyrymy ortasha jóndeýden ótti.
Júk tasymaly artady
Atalǵan joldyń paıdalanýǵa berilýi Qyzylorda jáne Ulytaý oblystarynyń turǵyndary úshin aıryqsha mańyzdy ári kópten kútken jańalyq boldy. Bul joba respýblıkanyń ońtústik jáne ortalyq óńirleri arasyndaǵy kólik baılanysyn nyǵaıtyp, óńirlik ekonomıkanyń damýyna, jolaýshylar men júk tasymalynyń qaýipsizdigin arttyrýǵa zor úles qosady.
«Qyzylorda–Jezqazǵan avtojolyn qaıta jańǵyrtý jumystary kompanııanyń júzege asyryp jatqan basym jobalarynyń biri. Qyzylorda oblysyndaǵy jańartylǵan ýchaskeniń paıdalanýǵa berilýi merdiger uıymdardyń, ınjenerlerdiń jáne sala mamandarynyń kásibı ári úılesimdi jumysynyń nátıjesi», dedi joldyń strategııalyq mańyzyna toqtalǵan «QazAvtoJol» ulttyq kompanııasynyń basqarma tóraǵasy Darhan Imanashev.
Qaıta jańǵyrtý jumystary 2022 jyly bastaldy. Joba aıasynda joldyń tehnıkalyq sanaty III sanattan II sanatqa aýystyryldy. Joldyń qurylysyna bes merdiger uıym tartylyp, jumystar bekitilgen óndiristik kestege saı júrgizildi.
Jobaǵa 7 zaýyt atsalysty
Jobaǵa 600-den astam maman, 400-ge jýyq jol-qurylys tehnıkasy jáne jeti asfaltbeton zaýyty jumyldyryldy. Qurylysta 2,6 mln tonnadan astam qıyrshyq tas, shamamen 66 myń tonna bıtým jáne 5 myń tekshe metr temirbeton buıymdary qoldanyldy. Sonymen birge 2,8 mln tekshe metr jer qazý jumystary oryndalyp, 1,2 mln tonnadan astam asfaltbeton qospasy tóseldi. Jol boıynda tórt demalys alańy, 43 temirbeton qubyry jáne alty mal ótkeli salyndy.
«Bul ýchaskede qozǵalystyń ashylýy jol júretin ýaqytty edáýir qysqartady, ótkizý qabiletin arttyrady jáne jol paıdalanýshylar úshin qolaıly ári qaýipsiz jaǵdaı jasaıdy. Kompanııa qalǵan ýchaskelerdegi jumystardy da joǵary sapamen ári belgilengen merzimde aıaqtaýdy jalǵastyrady», dep atap ótti D.Imanashev.
Ulytaý oblysyndaǵy ýchaskede de jumystar qarqyndy júrgizilip jatyr. Merdiger uıymdar qajetti tehnıkalardy jáne mamandardy tolyq mobılızasııalady. Jobany 2027 jyldyń aıaǵyna deıin aıaqtaý josparlanǵan.
«QazAvtoJol» ulttyq kompanııasy respýblıka boıynsha jol-kólik ınfraqurylymyn jetildirýge baǵyttalǵan aýqymdy bastamalardy turaqty túrde júzege asyryp, elimizdiń kólik júıesin damytýǵa jáne negizgi avtojoldarda sapa men qaýipsizdiktiń joǵary standarttaryn qamtamasyz etýge basymdyq berip keledi.
