Sýretterdi túsirgen – Erlan OMAR, «EQ»
Bıylǵy «Daryn» memlekettik jastar syılyǵy joǵary jetistikterge jetken 20 jas darynǵa berildi. Olardyń qatarynda halyqaralyq jáne respýblıkalyq konkýrstar, festıvaldar men kórmelerdiń laýreattary, respýblıkalyq jáne halyqaralyq deńgeıdegi sport jarystarynyń júldegerleri men jeńimpazdary, qoǵamnyń damýyna úles qosyp júrgen jastar bar.
Mádenıet jáne aqparat mınıstri Aıda Balaeva quttyqtaý sózinde jastar saıasaty salasynda jyl sanap jańa býyndy qoldaýǵa baǵyttalǵan sharalar men jobalar artyp kele jatqanyn, Prezıdent bastamasymen joǵary bilimniń qoljetimdiligi artyp, jas ǵalymdardy qoldaýǵa arnalǵan grant baǵdarlamalary kóbeıgenin, eńbek naryǵynda jas mamandardyń múmkindikterin arttyratyn jańa jobalar iske qosylǵanyn, kreatıvti ındýstrııa, sıfrlyq ekonomıka, kásipkerlik salasynda jastarǵa jol ashatyn bastamalar da memleket tarapynan qoldaý taýyp otyrǵanyn tilge tıek etti.
«Memleket basshysy árdaıym óz sózderinde jastarǵa qoldaý bildirip, úlken senim artyp keledi. Prezıdenttiń ár Joldaýy, qolǵa alǵan reformalary men bastamalary – jastardyń bolashaǵy men ıgiligi úshin jasalyp jatqan aýqymdy ózgeristerdiń naqty kórinisi. Bul reformalardyń ózegi – ádildik, zań men tártip, ashyqtyq pen jaýapkershilik sekildi qundylyqtarǵa negizdelgen. Ásirese «Zań jáne tártip», «Taza Qazaqstan» bastamalary men jappaı volonterlik aksııalardy jastardyń zor jaýapkershilikpen jáne úlken yntamen qoldap kele jatqany qýantady. Bul aýqymdy bastamalardyń barlyǵy – jańa ıdeologııanyń mańyzdy bóligi. Al osy ıdeologııany júzege asyratyn da, ony alǵa jeteleıtin de – ózderińiz», dedi mınıstr.
Laýreattar «Ǵylym», «Estrada», «Klassıkalyq mýzyka», «Halyq shyǵarmashylyǵy», «Sport», «Dızaın jáne beıneleý óneri», «Jýrnalıstıka», «Qoǵamdyq qyzmet», «Teatr jáne kıno», «Ádebıet» atalymdary boıynsha anyqtaldy.
2025 jylǵy jeńimpazdardyń qatarynda tanymal otandyq ánshi Eńlik Qurarbek (Yenlik), «Slavıan bazary-2024» halyqaralyq vokaldyq baıqaýynyń bas júldegeri Ernazar Juban, «Qaırat» fýtbol klýbynyń shabýylshysy Dastan Sátpaev bar.
«Daryn» memlekettik jastar syılyǵy jyl saıyn talantty jastardy eldik deńgeıde qoldaý maqsatynda beriledi. Syılyq ǵylymı, shyǵarmashylyq, qoǵamdyq qyzmettegi jetistikter men sporttyq nátıjelerdi yntalandyrýdy kózdeıdi.
30 jyldan astam ýaqyt ishinde bul syılyqty 360-tan asa jas talant ıelengen. Sonyń ishinde Nurlan О́nerbaev, Baqtııar Artaev, Serik Sápıev, Danııar Eleýsinov, Ilıa Ilın, Olga Shıshıgına, Denıs Ten, Qydyráli Bolmanov, «MýzART», «Báıterek» toby, Serik Ibragımov, Álı Oqapov, Qaırat Nurtas, Dımash Qudaıbergen jáne taǵy basqa kóptegen ónerpaz ben sportshy bar.
