«Circea» kompanııasynyń deregine sáıkes, 2022-2024 jyldar aralyǵynda AQSh joǵary oqý oryndarynda emtıhanǵa arnalǵan dástúrli kók dápterlerdi paıdalaný eki ese artqan. Sarapshylar bul ózgeristi generatıvti jasandy ıntellektiniń, ásirese «ChatGPT» sııaqty servısterdiń keń taralýymen baılanystyrady. «Pew Research Center» saýalnamasynda AQSh-ta kolledj oqytýshylarynyń 66 paıyzy tapsyrmalardy osyǵan baılanysty qaıta qurastyrǵanyn aıtqan. Al 76 paıyzy endi jumysty qaǵazǵa jazýdy talap etken. «EdWeek» zertteýinde muǵalimderdiń 56 paıyzy noýtbýk, smartfon men planshetti sabaqtaǵy basty kedergi dep ataǵan. Taǵy 43 paıyzy esep pen jazba jumysty qaǵaz-qalammen oryndaý akademııalyq adaldyqtyń eń senimdi tásili ekenin jetkizgen.
Birqatar oqý oryndary tehnologııany shekteýge kirisken. Rýtgers ýnıversıteti aýdıtorııada noýtbýk qoldanýǵa tyıym salsa, keı mektepter «PowerPoint»-tiń ornyna aýyzsha prezentasııalardy engizgen. Nıý-Iorktegi «Hunter College High School» ınformatıka sabaǵynda kod jazýdy bilim alýshylar esinde jaqsy saqtaýy úshin dápterge jazǵyzýǵa kóshken.
Bul qubylys AQSh-pen shektelmeıdi. 2023 jyly Shvesııa bastaýysh synyptarda sıfrlyq qurylǵylardy azaıtyp, qaǵaz oqýlyqtardy qaıta engizdi. Danııa men Fınlıandııa da osyndaı baǵytty ustanyp otyr. Sarapshylar muny tehnologııadan bas tartý emes, oqý sapasyn arttyrýǵa baǵyttalǵan qadam baǵalaǵan.
«The Economist» materıalynda áleýmettik aıyrmashylyq ta atap ótiledi. «Pew» deregi boıynsha, AQSh-ta afroamerıkalyq jasóspirimderdiń 70 paıyzy ınternetti «únemi paıdalanady», al aq násildiler arasynda bul kórsetkish 37 paıyz. Iаǵnı tehnologııaǵa táýeldilik tabys deńgeıi men ortaǵa baılanysty ózgeretinin jazady basylym.
