Oblys ákimi sharýalardy kásibı merekelerimen quttyqtap, aýyl sharýashylyǵyn damytý, agroónerkásip keshenin sıfrlandyrý, ınfraqurylymdy jańǵyrtý tárizdi mańyzdy mindetterdi sheshýmen birge, bıznes keıingi jyldary aýylǵa qoldaý kórsetý baǵytynda edáýir belsendi bola bastaǵanyn aıtty.
О́ńirde kásiporyndardy tehnıkalyq qaıta jaraqtandyrý, aýylsharýashylyq ónimderin tereńdete óńdeý jobalary qolǵa alynyp jatyr. Memleket basshysynyń tapsyrmasymen aýyl sharýashylyǵy qurylymdaryn qoldaýdyń jańa tetikteri iske qosyldy. 2025 jyly salaǵa 207 mlrd teńge bólindi. Bul ótken jylmen salystyrǵanda 60 paıyz, al 2023 jylmen salystyrǵanda eki ese kóp. Nátıjesinde oblys dıqandary bıyl alqaptan 7 mln tonnadan astam ónim jınap, sońǵy on jyl ishindegi eń joǵary kórsetkishke jetip otyr.
Oblys ákimi sharýashylyq basshylaryna aýyldy keshendi damytý qajettigin taǵy eskertti. Aıtýynsha, sońǵy úsh jyl ishinde aýyl turǵyndaryna qolaıly jaǵdaı jasaý úshin shamamen 254 mlrd teńge bólingen. Aýyldyq mekenderde túrli memlekettik baǵdarlamalar aıasynda sapaly aýyz sý tartylyp, turǵyn úı, mektep, balabaqsha, medısına jáne sport nysandary salynyp jatyr.
Qumar Aqsaqalov aýyldy damytýǵa erekshe úles qosqan birqatar kásiporyndardy atady. Mysaly, Qostanaı aýdanyndaǵy «Aıan-ozat», «Aleksandrovskoe» Qamysty aýdanyndaǵy «Altynsarın», Denısov aýdanyndaǵy «Frýnzenskoe» seriktestikteri, Uzynkól aýdanyndaǵy «Mıras» sharýa qojalyǵy tárizdi kásiporyndar aýyldy abattandyrý, turǵyn úı salý, aýyl sporty men mádenıetin qoldaý baǵytynda aýyz toltyryp aıtarlyqtaı tushymdy is tyndyrǵan.
Aımaq basshysynyń sózinshe, óńirde mal sharýashylyǵyn damytýǵa erekshe kóńil bólinip, zamanaýı joǵary tehnologııaly sút fermalary salynyp jatyr. 2025-2027 jyldary oblysta jalpy quny 383 mlrd teńge bolatyn 93 ınvestısııalyq joba iske asyrylmaq. Sondaı-aq, óńdeý salasynda 18 joba iske asyrylyp, 3 myńǵa jýyq jańa jumys orny ashylady.
Oblys ákimi is-shara sońynda aýyldy kórkeıtýge, aýyl turǵyndarynyń ómir súrý sapasyn arttyrýǵa eleýli úles qosyp kele jatqan kásipkerlerdi marapattady.
