«Arsenal» qatarynan alty ret jeńiske jetti

ASTANA. 22 naýryz. Keshe fýtboldan aǵylshyn premer-lıgasynyń 30-týry aıasynda 7 oıyn ótti. Nıýkasldaǵy jergilikti «Nıýkasl Iýnaıted» pen Londonnyń «Arsenaly» arasyndaǵy match jankúıerlerdiń erekshe qyzyǵýshylyǵyn týdyrdy. Bul týraly egemen.kz habarlady. Oıyn teń dárejede órbidi. Dese de, úziliske deıin Arsen Vengerdiń shákirtteri eki gol soǵyp úlgerdi. Kezdesýdiń 24 jáne 28-mınýttarynda Olıve Jırý mergendigimen kózge túsip, dýbldiń avtory atandy. Alań ıeleri ekinshi kezeńniń basynda esep aıyrmasyn qysqartqanymen (Mýssa Sıssoko 48), odan árige shamalary jetpedi. Nátıjesinde, qonaqtar 2:1 esebimen jeńiske jetti. Bul «Arsenaldyń» bıylǵy chempıonattaǵy 18-jeńisi. Sondaı-aq, qatarynan alty ret qarsylastarynan basym túsip otyr. Búginde Londonnyń komandasy týrnır kestesinde 60 upaımen 3-orynda keledi. Al «Nıýkasl Iýnaıted» 12-satyda tur. 30 týrdan keıin olardyń enshilerinde 35 upaı bar. Aǵylshyn premer-lıgasynda ázirge 64 upaımen «Chelsı» kósh bastap keledi. Joze Moýrıno jattyqtyratyn komandanyń búgingi oıynyn eseptemegende taǵy bir kezdesýi kem ekenin aıta keteıik. Keshe ótken qalǵan oıyndardyń nátıjeleri: «Manchester Sıtı» – «Vest Bromvıch» 3:0; «Tottenhem» – «Lester» 4:3; «Stok Sıtı» «Krıstal Pelas» 1:2; «Saýtgempton» – «Bernlı» 2:0; «Aston Vılla» – «Sýonsı» 0:1; «Vest Hem» – «Sanderlend» 1:0. Búgin myna komandalar jasyl alańǵa shyǵady: «Lıverpýl» – «Manchester Iýnaıted»; KPR – «Everton»; «Hall Sıtı» – «Chelsı». Elaman Qońyr. Derek: egemen.kz. Sýret: footboom.com.