Foto: Úkimettiń baspasóz qyzmeti
150 sharshy metrden asatyn jańa ǵımarat bir aýysymda 25 adamdy qabyldaýǵa arnalǵan. Medısınalyq pýnkt aýyldyń 300-den astam turǵynyna sapaly jáne ýaqtyly medısınalyq qyzmet kórsetý múmkindigin beredi. Nysan zamanaýı medısınalyq jabdyqtarmen qamtamasyz etilgen.
«Qurylys kezinde ınklıýzıvtilikke, qımyl-qozǵalysy shekteýli adamdardyń qoljetimdiligin qamtamasyz etýge kóńil bólindi. Medısınalyq nysannyń ashylýy aýyl turǵyndarynyń alǵashqy medısınalyq-sanıtarııalyq kómekke qoljetimdiligin arttyrady, sondaı-aq medısına qyzmetkerleriniń eńbek jaǵdaıyn jaqsartady. Aqtóbe oblysynda qaıtarylǵan aktıvter qarajaty esebinen qurylǵan Arnaýly memlekettik qordan aýyldyq densaýlyq saqtaý salasy boıynsha barlyǵy 11 joba júzege asyrylyp jatyr. Búgingi tańda 5 nysan paıdalanýǵa berildi, altaýynyń qurylysy jalǵasýda», delingen habarlamada.
Jalpy, qaıtarylǵan aktıvter elimizde densaýlyq saqtaý salasyn damytýǵa baǵyttalǵan. 2024-2025 jyldary Arnaýly memlekettik qordan medısınalyq nysandardy salý jáne jańartý úshin 144,2 mlrd teńge bólindi. Bul aýqymdy ınfraqurylymdy jańartý aýyl turǵyndaryna sapaly medısınalyq qyzmetterdi qalaǵa barmaı-aq alýǵa múmkindik berdi.
«Aýylda densaýlyq saqtaýdy jańǵyrtý» ulttyq jobasy aıasynda 2022–2025 jyldary aýyldyq jerlerde 813 medısınalyq nysan salyndy, onyń ishinde 620 alǵashqy medısınalyq-sanıtarııalyq kómek kórsetý mekemesi bar. 2024 jyly 392 nysan paıdalanýǵa berildi, al 2025 jyly taǵy 188 nysannyń salynýy josparlanǵan.
«Zamanaýı aýdanaralyq aýrýhanalar men MSAK jelisin damytý ult densaýlyǵynyń kórsetkishterin tikeleı jaqsartty. Osylaısha, onkologııalyq aýrýlardy erte anyqtaý 3,5%-ǵa ósip, 32,6%-dy qurady, al 60%-dan astamy bastapqy satysynda dıagnoz qoıylady. 23-i aýdandyq aýrýhanalarda ornalasqan 83 ınsýlt ortalyǵynyń jumysy trombolız úlesin 6%-ǵa deıin arttyrýǵa múmkindik berdi. Sonymen qatar jańa mamandandyrylǵan ortalyqtardyń ashylýy balalarǵa ońaltý kómeginiń qoljetimdiligin edáýir arttyrdy», delingen habarlamada.
Medısına ınfraqurylymyn jaqsartý jáne qyzmet kórsetý sapasyn arttyrýǵa baǵyttalǵan keshendi sharalar aýyl turǵyndarynyń ómir súrý uzaqtyǵyna oń áserin tıgizip, 2024 jyldyń qorytyndysy boıynsha bul kórsetkish 74,2 jasqa jetti.
