Foto: ashyq derekkóz
Krisha.kz bankterdiń qazirgi sharttaryna, Ulttyq banktiń josparlaryna jáne sarapshylardyń boljamdaryna taldaý júrgizdi.
2025 jyly ıpoteka naryǵy qysymǵa ushyrady. Bazalyq mólsherleme kóterilgennen keıin ekinshi deńgeıli bankter ıpoteka berýdi ýaqytsha toqtatty. Keıin qaıta iske qosyp, talaptaryn ózgertken edi. Tek Otbasy banki ǵana nesıe berýdi burynǵy sharttarmen jalǵastyrdy.
Birinshi naryqtaǵy baspanaǵa (pervıchnyı rynok) ıpoteka rásimdeý jeńilirek. Al ekinshi naryqtaǵy (vtorıchnyı rynok) baspanaǵa arnalǵan ıpoteka kez kelgen bankte qoljetimdi emes.
Búginde ekinshi naryqtaǵy turǵyn úıge nesıe usynatyn bes bank qaldy:
-
Halyk Bank
-
Bank SentrKredıt
-
ForteBank
-
Altyn Bank
-
Otbasy bank
Qalǵan bankterde baǵdarlamalar shektelgen nemese ýaqytsha toqtatylǵan.
Ekinshi deńgeıdegi bankterdiń ıpoteka rásimdeý kezindegi sharttary kelesideı:
-
Ortasha mólsherleme – jyldyq 22%;
-
Bastapqy jarna – 20%-dan bastap;
-
Merzim – 20 jylǵa deıin.
Otbasy bank sharttary:
-
Mólsherleme – 3,5%-dan (turǵyn úı qaryzy) 8,5%-ǵa (aralyq qaryz) deıin;
-
Jınaq – depozıtte 50%-dan bastap.
2026 jyly ıpotekaǵa qandaı ózgerister engizilýi múmkin
Basty jańalyq – mólsherleme esepteý ádistemesi ózgerip, jeke belgilenedi.
Mólsherleme tómendegi faktorlarǵa tikeleı baılanysty bolady:
-
nesıe merzimi;
-
bastapqy jarna kólemi;
-
qaryz alýshynyń táýekeli.
Mysaly, bastapqy jarna 20% jáne merzim uzaq bolsa – táýekel joǵary, tıisinshe mólsherleme de joǵary bolady. Al jarna 50–70% jáne merzim qysqa bolsa – táýekel tómen, mólsherleme azaıady.
Jańa júıe kelesi jyldyń shilde aıynan bastap kúshine enýi múmkin.
Jyljymaıtyn múlik baǵasynyń qazirgi jaǵdaıy
Baǵalar barlyq iri qalalarda turaqty ósip jatyr. 2025 jylǵy tamyzdan bastap jańa qurylystardaǵy páter baǵalary aı saıyn artyp keledi.
Ekinshi naryqta da ósim baıqalady, ári páterdiń 1 kvadratqa shaqqandaǵy quny rekordtyq deńgeıge deıin ósti. Máselen, Almatyda páterdiń ortasha baǵasy kvadratyna 803 380 teńgeni quraıdy.
Ipotekany qazir alǵan durys pa, álde kútken jón be?
Sarapshylardyń paıymynsha, aldaǵy aılarda bazalyq mólsherlemeni tómendetý josparda joq.
«Jyldyq 20–25% mólsherleme – ıpotekanyń jańa shyndyǵy. Paıyzdyq mólsherlemeni keıin qaıta qarjylandyrý arqyly ózgertýge bolady, alaıda bastapqy qaryz somasyn azaıtý múmkin emes. Sondyqtan qolaıly baǵamen páter taýyp, aı saıynǵy tólem óz bıýdjetińizge saı kelse – ıpotekany qazir alǵan durys. Bolashaqta jaǵdaı qıyndaı túsedi, páter alý múmkindigi shekteledi», deıdi Krisha.kz satý bóliminiń jetekshisi Imran Osmanov.
Onyń aıtýynsha, eger tıimdi baǵada páter tapsańyz, aldyn ala maquldaýdan ótip, aı saıynǵy tólem qolaıly bolsa, 2026 jylǵy jańa baǵa ósimine deıin úlgergińiz kelse úı alýǵa bolady. Eger Otbasy bankinde jınaǵynyń bolyp, ıpotekalyq turǵyn úı qaryzyna ótýdi josparlap júrseńiz kútken jón bolady.
