Foto: vıdeodan kadr
Mınıstr áleýmettik jelidegi paraqshasynda Nasıba Jańabaevanyń óz mindetine jaýapty, árqashan kómek kórsetýge daıyn medısına qyzmetkeri bolǵanyn aıtty.
«Jedel medısınalyq járdem feldsheri Nasıba Muhtarqyzy Jańabaevanyń qyzmettik mindetin atqarý kezinde qaza tapqany týraly qaraly habardy tereń kúızelispen qabyldadym. Nasıba nebári 23 jasta edi, tórt aı buryn ǵana Almaty qalasynyń Jedel járdem qyzmetine jumysqa turǵan bolatyn. Osy qysqa ýaqyt ishinde ol óz mindetine jaýapty, adal, janashyr, árqashan kómek kórsetýge daıyn medısına qyzmetkeri retinde tanyldy. Nasıba Muhtarqyzynyń týǵan-týystaryna, jaqyndaryna, áriptesterine jáne Almatynyń búkil medısınalyq qaýymdastyǵyna qaıǵyryp kóńil aıtamyn», dep jazdy A.Álnazarova.
Aıta keteıik, 2025 jyldyń 3 jeltoqsanyna qaraǵan túni Almatyda jedel járdem kóliginiń qatysýymen jol apaty boldy. Apat saldarynan jedel járdem kóligindegi 2002 jyly týǵan feldsher Nasıba Jańabaeva qaza tapty.
