Erjan Birjanovtyń dereginshe, jeke tulǵalardyń bankrottyǵy boıynsha zańnama kezeń-kezeńimen jetildirilip jatyr. Bıyl qabyldanǵan ózgeristerdiń qatarynda 2025 jyldyń 1 qańtaryna deıin jasalǵan qaryz sharttary boıynsha mindetti túrde qaryzdy retteý talabynyń alyp tastalýy bar. Sonymen birge boryshkerge sottan tys bankrottyq rásimin sebep kórsetpeı toqtatýǵa múmkindik berilgen.
Sondaı-aq bankrottyń qarjy uıymdary aldyndaǵy barlyq mindettemeleri, kredıttik bıýrolar bazasynda kórinbeıtin qaryzdarymen qosa, tolyq toqtatylady.
Qazir parlamentte lombardtardy sottan tys bankrottyq rásimine qatysatyn kredıtorlar tiziminen shyǵarý jónindegi túzetýler qaralyp jatyr. Budan bólek, bereshegi 1600 AEK-ten aspaıtyn azamattar úshin bankrottyq rásiminiń merzimin qysqartý usynylǵan.
Jeke tulǵalardyń bankrottyǵy Qazaqstanda 2023 jylǵy 3 naýryzdan bastap qoljetimdi boldy. Osy ýaqyt ishinde myńdaǵan azamat qaryz máselesin túbegeıli sheshý úshin osy tetikke júgingen.
2025 jyldyń maýsym aıynyń sońynda qarjy naryǵyn damytý, tutynýshylar quqyǵyn qorǵaý jáne baılanys salasyna qatysty birneshe zańǵa ózgerister engizilgen jańa qujatqa qol qoıyldy. Ol "Azamattardyń tólem qabilettiligin qalpyna keltirý jáne bankrottyǵy týraly" zańdy jetildirýdi de qamtıdy. Engizilgen túzetýler azamattarǵa qaryzdy keshirtýge nemese tólemdi keıinge shegerýge múmkindik bere otyryp, olardyń qarjylyq jaǵdaıyn jeńildetýge baǵyttalǵan.
Bul ózgerister 31 tamyzda kúshine endi jáne buǵan deıin ótinishi qabyldanbaı qalǵan boryshkerlerge de óz máselesin qaıta qaratýǵa jol ashady.
