Foto: © freepik.com
Bul bastama eldegi atom energetıkasynyń bolashaǵyn qamtamasyz etetin ınjenerlik, tehnıkalyq pen ǵylymı baǵyttar boıynsha joǵary bilikti mamandar daıarlaýǵa jol ashady. Memlekettik ári salalyq negizgi ınstıtýttardyń birlesip qatysýy adamı kapıtaldy damytýdyń keshendi tásilin qalyptastyryp, bolashaq atom jobalary úshin sapaly kadrlyq baza qurýǵa múmkindik beredi.
Jańa baǵdarlama aıasynda 2026 jyly «Bolashaq» halyqaralyq baǵdarlamasy boıynsha pılottyq rejımde 20 grant bólý josparlanyp otyr. Aldaǵy jyldary mundaı granttar jyl saıyn turaqty túrde usynylady. Oqý halyqaralyq taǵylymdamalardy, sondaı-aq sheteldiń jetekshi ýnıversıtetterindegi magıstratýra men doktorantýra baǵdarlamalaryn qamtıdy.
Jobanyń negizgi maqsaty – atom tehnologııalaryn qaýipsiz engize alatyn, ǵylymı-tehnıkalyq progresti alǵa bastaıtyn jańa býyn ınjenerler men ǵalymdardy daıarlaý. Eldiń Atom energetıkasy jónindegi agenttiginiń tóraǵasy Almasadam Sátqalıevtiń aıtýynsha, bul bastama Memleket basshysynyń zamanaýı energetıkalyq klaster qalyptastyrý jónindegi tapsyrmasyna tolyq sáıkes keledi.
«Bólinip otyrǵan granttar – bul salanyń bolashaǵyn qalyptastyratyn adamdarǵa jasalǵan ınvestısııa. Dál osy mamandar atom energetıkasynyń ornyqtylyǵyn arttyryp, halyqaralyq básekege qabilettiligin kúsheıtedi», dedi agenttik tóraǵasy.
Sarapshylardyń pikirinshe, baǵdarlamanyń iske qosylýy eldiń ǵylymı-tehnıkalyq áleýetin nyǵaıtyp, atom energetıkasy salasynda myqty ári uzaq merzimdi kadrlyq negiz qalyptastyrýǵa serpin beredi. Bul óz kezeginde eldiń energetıkalyq qaýipsizdigi men joǵary tehnologııaly ekonomıka qurý jolyndaǵy strategııalyq maqsattaryna qyzmet etedi.
