Foto: Aqorda
«Asa qurmetti Prezıdent myrza, Qazaqstanǵa qosh keldińiz! Elimizge alǵash ret resmı saparmen kelip otyrsyz. Qazaqta «Kórshi tatý bolsa – qut» degen jaqsy sóz bar. Eki eldi qart Kaspıı baılanystyrady. Qazaqstan Irandy jaqyn ári baýyrlas kórshi, Orta Shyǵystaǵy senimdi seriktes dep biledi. Biz qashanda Iranǵa tileýlespiz. Qıyndyqtarǵa qaramastan qarym-qatynasty úzgen joqpyz. Qazaq-ıran baılanysynyń tamyry tereńde jatyr. Qos halyqtyń tarıhy – ortaq, salt-dástúri men mádenıeti – uqsas. Yqpaldastyǵymyz ǵasyrlar boıy jalǵasyp kele jatyr. Qazaq eli árdaıym Irandy qoldaıdy, aramyzda eshqandaı túıtkil, ıá bolmasa, sheshilmegen másele joq. Sondyqtan eki el arasyndaǵy qarym-qatynastyń keleshegi zor. Qazaqstan men Iran arasynda syndarly saıası dıalog qalyptasqan, úkimetterimiz birlesip jumys isteıdi. О́zara ýaǵdalastyqtarymyz oryndalýda, parlamentaralyq baılanys ta nyǵaıyp keledi. Saýda-ekonomıka salasyndaǵy alys-beris jyldan jylǵa kúsheıip keledi. Bıylǵy 10 aıda kórsetkishter byltyrǵymen salystyrǵanda 40 paıyzǵa artty. Bul – árıne, óte jaqsy jetistik. Biraq osy qarqyndy toqtatpaı, ózara saýda kólemin ulǵaıta túsý qajet», dedi Prezıdent.
Masýd Pezeshkıan óz kezeginde tarıhy tereń, mádenıeti baı baýyrlas, dostas Qazaqstanǵa kelgenine qýanyshyn bildirdi.
«Kóptegen baǵytta yntymaqtastyǵymyz qarqyndy túrde damyp keledi. Úkimetterimiz nátıjeli jumys atqarýda. Saıası-ekonomıkalyq, mádenı-gýmanıtarlyq jáne qaýipsizdik salalaryndaǵy yqpaldastyqtyń áleýeti zor dep oılaımyn», dedi Iran Prezıdenti.
