Onyń aıtýynsha, 2025 jyly Sıfrlyq transformasııa ofısi qurylyp, otyn-energetıka kesheniniń sıfrlyq transformasııa kartasy bekitildi. Sonymen qatar aqparattyq júıeler men derekter modelderiniń maqsatty arhıtektýrasy ázirlenip, EnergyTech biryńǵaı salalyq platformasyn qalyptastyrý bastaldy.
«2025 jyly jasandy ıntellektke negizdelgen eki júıe pılottyq rejımde sátti synaqtan ótti. Onyń biri – drondar men jasandy ıntellektini qoldaný arqyly áýe elektr berý jelilerindegi aqaýlardy anyqtaý júıesi. Bul jobanyń kútiletin ekonomıkalyq áseri 2,5 mlrd teńgeni quraıdy. Ekinshisi – robottandyrylǵan keshen men jasandy ıntellekt negizinde jylý jelileriniń qubyr ishindegi aqaýlaryn anyqtaý júıesi. Bul jobadan kútiletin ekonomıkalyq tıimdilik 42 mlrd teńgege baǵalanyp otyr. Qazirgi ýaqytta eki joba da normatıvtik bekitý men aýqymdaý kezeńinde», dedi Baqytjan Ilııas.
Vıse-mınıstrdiń aıtýynsha, EnergyTech biryńǵaı platformasy SmartGrid jáne SmartField komponentterin qamtıdy. Bul júıeler kıberqaýipsizdik talaptaryn eskere otyryp, salalyq derekterdi onlaın rejımde jınaýǵa jáne berýge múmkindik beredi. Al QazTech platformasymen ózara yqpaldastyq derekter sapasyn arttyryp, jasandy ıntellekt tehnologııalaryn keńinen qoldanýǵa jol ashady.
