Foto: x.com/ZelenskyyUa
Qaýipsizdik kepildikteri
Bul týraly ol 16 jeltoqsanda Nıderlandyda jýrnalıstermen kezdesý barysynda aıtty.
«Bizde Ýkraınanyń qaýipsizdigi úshin ajyramas birneshe kepildik blogy bar. Bul – «qalaýlylar koalısııasy». Eýropa usyna alatyn múmkindikter bar, sondaı-aq koalısııa quramynda mártebesi men konstıtýsııasy ártúrli basqa elder de bar. Búginde koalısııa músheleri qatarynda Kanada men Japonııa da bar», dedi V.Zelenskıı.
Ýkraına Prezıdentiniń sózinshe, birinshi kepildik – AQSh tarapynan beriletin ekijaqty qaýipsizdik kepildikteri.
«NATO jarǵysynyń besinshi babyna negizdelgen AQSh-tyń ekijaqty qaýipsizdik kepildikteri. Biz bul másele boıynsha egjeı-tegjeıine deıin jettik, jumys istep jatyrmyz. Bul «Býdapesht» nemese «Mınsk» formatyndaǵy emes, AQSh Kongresi qoldaýy tıis, zańdy turǵyda mindetteıtin myqty kepildikter bolýy kerek», dedi ol.
Sonymen qatar ol Eýropalyq odaqtan keletin kepildikterdi de mańyzdy dep atady.
«Eń aldymen – ekonomıkalyq kepildikter. Bul – Eýropalyq odaqqa múshelik. Munyń barlyǵyn biz qaýipsizdik kepildikteriniń birtutas blogy retinde qarastyramyz», dep túıindedi Ýkraına basshysy.
Donbass
Buǵan deıin Berlınde jýrnalıstermen sóılesken Zelenskıı AQSh usynǵan beıbit jospar aıasynda aýmaq máselesi talqylanyp jatqanyn, alaıda Kıev Donbasty Reseı aýmaǵy retinde moıyndamaıtynyn aıtqan.
«Bul – Donbassqa qatysty kez kelgen format úshin men úshin mańyzdy ustanym. Biz Donbasty Reseıdiń aýmaǵy dep moıyndamaımyz. Áńgime ýaqytsha okkýpasııalanǵan bólikter týraly bolyp otyr. Degenmen aýmaq máselesin talqylaımyz, óıtkeni bul – negizgi suraqtardyń biri. Ázirge ortaq kelisim joq», dedi V.Zelenskıı.
Ol Reseı tarapynan ustanym ózgermegenin de atap ótti.
«Reseılikter Donbasty qalaıdy – bul olardyń ustanymy. Al bizdiń ustanym – praktıkalyq, naqty jáne ádiletti. Biz Donbasty bergimiz kelmeıdi. Amerıkalyqtar ymyra tabýǵa tyrysyp jatyr, olar erkin ekonomıkalyq aımaq usynyp jatyr. Alaıda erkin ekonomıkalyq aımaq degenimiz – Reseı Federasııasynyń basqarýyndaǵy aýmaq degen sóz emes», dedi Ýkraına Prezıdenti.
Mereke kezinde maıdan toqtaı ma?
Osy ýaqytta Kreml maıdandaǵy atysty Rojdestvo merekesi kezinde toqtatý týraly usynysty qabyldamady.
«Bizge ýaqytsha bitim emes, naqty beıbitshilik kerek. Ýkraınaǵa demalyp, soǵysty jalǵastyrýǵa múmkindik berý úshin emes. Biz soǵysty toqtatqymyz keledi, maqsattarymyzǵa jetip, óz múddelerimizdi qorǵap, Eýropadaǵy bolashaq beıbitshilikti qamtamasyz etkimiz keledi», dep RIA Novostı Reseı Prezıdentiniń baspasóz hatshysy Dmıtrıı Peskovtyń sózin keltiredi.
Aıta ketelik, Berlındegi kelissózderden keıin Germanııa kansleri Frıdrıh Mers Reseıge kem degende Rojdestvo kezinde urys-qımyldy toqtatýdy usynǵan.
V.Zelenskıı Ýkraına men AQSh Rojdestvo jáne Jańa jyl merekeleri kezinde ýaqytsha bitim ıdeıasyn qoldaǵanyn, alaıda bári Máskeýdegi saıası erik-jigerge baılanysty ekenin aıtty.
