Jylyna 120 myń kólik shyǵarady
«Astana Motors» kompanııasy bıyl qyrkúıekte taǵy bir irgeli jobany iske qosty. Ol – Qytaıdyń jetekshi úsh avtokólik brendin, atap aıtqanda «Chery», «GWM» (Haval, Tank) jáne «Changan» kólikterin óndiretin álemdegi alǵashqy mýltıbrendti zaýyt – «Astana Motors Manufacturing Kazakhstan». Bul joly biz at basyn burǵan birinshi kásiporyn da osy edi.
Mundaǵy mamandar bólshekten bútindi shyǵarady. Bastapqyda shanaq esh detali joq, sup-sur temir qańqa bop keledi. Onyń ishi-syrtyndaǵy myńdaǵan bólshekti osy zaýyt jumysshylary ózderi dánekerleıdi, usaq detaldan bastap ózderi quraıdy, buraıdy, syrlaıdy. Muny «usaq túıindi ádis» dep ataıdy eken. Sońynda daıyn kólikti aldyńyzǵa kóldeneń tartady. Eki aýysymmen jumys istegende jylyna 120 000 kólik daıyndaıdy.
AMMKZ zaýytynda da dánekerleýden bastap qurastyrýǵa deıingi kezeńde jalpy sany 54 robot qoldanylady eken.
Biraq, bul «daıyn asqa tik qasyq» bolý degen sóz emes. Jumystyń úlken bóligin mamandar isteıdi. Qazir kásiporynda 2450 adam bar. Tolyq qýatqa shyqqanda shtat 3600-ge deıin ósedi desedi. Qarapaıym jumysshydan bastap, seh basshysy, ınjener degenderdiń bári – jergilikti azamattar, kópshiligi - osy Almaty oblysynyń turǵyndary.
Buǵan qosa «Astana Motors» kólik shyǵarýda lokalızasııany tereńdetý isine de erekshe mán berip otyr. Iаǵnı, sheteldiń daıyn dúnıesin quraı bermeı, otandyq úlesti ulǵaıtý kerek.
«Astana Motors» Úkimetpen lokalızasııany tereńdetý jóninde dıalog júrgizip jatyr. Otandyq úles ósýi úshin avtoónerkásipke degen talapty arttyrý qajet. Bıyl kásiporyndarymyzda kóliktiń 30%-y shanaqty dánekerleý jáne boıaý arqyly usaq túıindi ádispen (CKD) óndirildi. Bul bizde avtokóliktiń túpkilikti qunyn tómendetýge múmkindik beredi. Máselen AMMKZ zaýyty iske qosylǵannan keıin ondaǵy modelderdiń baǵasy 12-19% tómendedi», deıdi «Astana Motors» negizin qalaýshy Nurlan Smaǵulov.
Kompanııanyń túpkilikti kózdegeni – avtokomponentter óndirisi esebinen lokalızasııany 5 jyl ishinde 51%-ǵa jetkizý.
«Jergilikti úles 51%-dan assa avtokólikterimizdi syrt elderge kedendik tarıftersiz ótkizemiz», deıdi «Astana Motors» bas dırektory Beknur Nesipbaev.
Kompanııa basshylarynyń aıtýynsha, qyzmetkerlerdiń ortasha jalaqysy – 450 myń teńge. Medısınalyq saqtandyrýdy qyzmetkermen qosa otbasynyń taǵy eki múshesi paıdalana alady, oǵan tis dárigeriniń qyzmeti de kiredi eken. Myń oryndyq zamanaýı ashanada tamaq tegin beriledi. Ǵımarattyń ishinde, keńseniń qaq ortasynda ósimdiktiń túr-túri jaıqalǵan qysqy baq ornalasqan. Odan ári ótseńiz fıtnes-ortalyq, fýtbol, voleıbol, basketbol zaldary, boks seksııasy jarqyrap tur. Onyń bári tegin.
Avtobólshekter ózimizde jasalady
Budan ári «Astana Motors» avtokomponentter óndirý tehnoparkimen tanystyq.
«Almaty Autoparts Production» kásiporny «Hyundai Trans Kazakhstan» zaýytynda óndiriletin «Hyundai Tucson» jáne «Santa Fe» modelderiniń oryndyǵyn shyǵarady. Qýaty jylyna 100 myń oryndyq shyǵarýǵa jetedi. Zaýytta qazir 150 jumysshy bar. Ekinshi kezeńde oryndyq qaptaý sehy iske qosylǵan soń jumysshylar sany 350 adamǵa deıin ósedi deıdi. Kompanııa basshysynyń aıtýynsha, buryn mundaı oryndyqtar daıyn kúıinde Koreıadan tasymaldanyp kelipti. Ol – úlken shyǵyn edi. Qazir sony ózimizdiń mamandar jasaýdy úırenip, taýar quny aıtarlyqtaı tómendep otyr. Bul avtokólik baǵasynyń sál de bolsa arzandaýyna sep.
Mýltımedııalyq júıeler shyǵaratyn «Kazakhstan Mobility Engineering» kásiporny da jylyna 100 myń dana ónim daıyndaı alady. Mýltımedııalyq júıe degenińiz – avtokóliktiń aýdıo-vıdeo qurylǵysy. Iаǵnı, elimizde shyǵarylyp jatqan «Tucson», «Elantra», «Palisade», «Santa Fe» jáne «Mufasa» sekildi modelderiniń qurylǵylaryn ózimizdiń Almaty qalasy men Almaty oblysynan shyqqan mamandar jasap jatyr. Jospar boıynsha «Astana Motors Manufacturing Kazakhstan» mýltıbrendti zaýyty (Almaty) da óziniń avtokólik óndirisinde «Kazakhstan Mobility Engineering» kásiporny shyǵarǵan mýltımedııalyq júıelerdi qoldanatyn bolady.
50 myń «Hyundai» kólikterin óndiredi
«Astana Motors» kompanııasynyń «Hyundai Trans Kazakhstan» enshiles kásiporny – «Hyundai» jeńil avtokólikterin óndiretin tolyq sıkldy zaýyt. О́ndiris qýaty jylyna 50 myń avtokólik shyǵarýǵa jetedi. 2025 jyldyń sońǵy 10 aıynda 43 665 avtokólik shyǵarylypty. Jalpy 2020 jyldan bastap kásiporyn 209 437 avtokólik óndirgen eken.
Qazir munda «Hyundai» brendiniń «Tucson», «Mufasa», «Sonata», «Elantra», «Santa Fe», «Palisade», «Staria», «Custin» jáne premıým sanatyndaǵy «Genesis» brendiniń tórt modeli shyǵarylady. 2020 jyldan beri kásiporyn mamandary «Hyundai Accent», «Hyundai Tucson», «Hyundai Santa Fe» modelderin dánekerleý men boıaý usaq túıindi óndirý (CKD) ádisimen 1000-nan asa operasııany meńgeripti.
