«Sıfrlyq transformasııa men jasandy ıntellektini damytý salasynda yntymaqtastyq ornatý óte ózekti.
Japondyq ınnovasııalar sapa, senimdilik jáne joǵary tehnologııa turǵysynan keńinen tanymal.
Qazaqstan sıfrlyq memleketke aınalý jolyna tústi. Osy maqsatta Alem.ai. halyqaralyq jasandy ıntellekt ortalyǵy ashyldy.
Bıyl elimiz amerıkalyq tehnologııalar bazasynda eki sýperkompıýterdi iske qosty.
Kelesi jyly ónerkásip, memlekettik sektor, áleýmettik qamsyzdandyrý jáne bilim berý salalaryn sıfrlandyrýǵa baǵyttalǵan Digital Qazaqstan strategııasyn júzege asyrýdy bastaımyz.
Osylaısha, Qazaqstanda jasandy ıntellekti men sıfrlyq tehnologııalardy odan ári damytý úshin ońtaıly jaǵdaı jasalady.
Bul rette biz Tokıonyń Ortalyq Azııa elderi men Japonııa arasynda jasandy ıntellekt salasy boıynsha tyń seriktestik ornatý jónindegi bastamasyn qoldaımyz.
Atalǵan platformany Ortalyq Azııadaǵy eń iri IT-startap «Astana Hub» jáne qajetti ınfraqurylymy men halyqaralyq ekojúıesi bar Alem.ai ortalyǵynyń bazasyna ornalastyrýdy usynamyz», dedi Prezıdent.
Qasym-Jomart Toqaev elimizde japon ýnıversıtetteri men bilim ortalyqtarynyń bólimshilerin ashýdy usyndy.
«Adam kapıtaly – damýdyń basty qozǵaýshy kúshi. Japonııa bul formýlanyń durystyǵyn naqty dáleldedi.
Adam, eńbekke qurmet kórsetý, udaıy jetilýge umtylý, ómir boıy oqý, óskeleń urpaqqa bilim berý – Sizdiń memleketińizdiń artyqshylyǵy.
Qazaqstan bilim salasyn belsendi damytyp jatyr. Ásirese, sheteldik seriktesterimizben birge osy baǵytta aýqymdy jumys atqarylýda. Elimizde shet memleketterdiń jetekshi joǵary oqý oryndarynyń fılıaldary tabysty qyzmet etýde.
Japonııaǵa Qazaqstanda ýnıversıtetter men bilim ortalyqtarynyń bólimshilerin ashý múmkindigin qarastyrýdy usynamyz», dedi Memleket basshysy.
