Is 2021 jylǵy mamyr aıynda resmı sapar kezinde Saýd Arabııasynyń taq murageri Imran Hanǵa syıǵa tartqan Bulgari brendiniń qymbat zergerlik buıymdar jıyntyǵyna baılanysty qozǵalǵan. Sot prosesi barysynda aıyptaý tarapy eks-premerdiń zergerlik buıymdy memleketke tapsyrmaı, ózinde qaldyrǵanyn, ol úshin nebári 2,9 mln pákistan rýpııasyn (shamamen 10 350 AQSh dollary) tólegenin alǵa tartty. Al zergerlik jıyntyqtyń naryqtaǵy quny shamamen 80 mln rýpııaǵa (285 500 AQSh dollary) baǵalanady.
Úkim Ravalpındı qalasyndaǵy Adıala túrmesinde ótken kóshpeli sot otyrysynda Ortalyq sottyń arnaıy sýdıasy Shahrýh Ardjýmand tarapynan shyǵaryldy. Qazirgi ýaqytta Imran Han osy túrmede jazasyn ótep jatyr.
Sot sheshimimen Imran Han memlekettik qyzmetshilerdiń laýazymdyq qylmystary men senimdi teris paıdalaný baptary boıynsha kináli dep tanylyp, 17 jylǵa bas bostandyǵynan aıyryldy. Osy baptar boıynsha onyń jubaıy Býshra Bıbı de 17 jylǵa sottaldy.
Sonymen qatar, ekeýine de 16,4 mln rýpııa (shamamen 58 500 AQSh dollary) kóleminde aıyppul salyndy. Zańnamaǵa sáıkes, aıyppul tólenbegen jaǵdaıda qosymsha túrme jazasy qarastyrylǵan.
Pákistannyń aqparat mınıstri Attaýlla Tarardyń aıtýynsha, bul is boıynsha taǵaıyndalǵan jaza Imran Hannyń burynǵy úkiminiń merzimi aıaqtalǵannan keıin eseptele bastaıdy. Aıta keteıik, 2025 jylǵy qańtarda ol 190 mln fýnt sterlıngke qatysty sybaılas jemqorlyq isi boıynsha 14 jylǵa sottalǵan bolatyn. Atalǵan is aıasynda onyń jubaıy da jeti jylǵa bas bostandyǵynan aıyrylǵan.
Budan bólek, Imran Hanǵa 2023 jylǵy 9 mamyrdaǵy jappaı narazylyqtarǵa baılanysty terrorızmge qarsy zań aıasynda taǵy bir sot prosesi ótýi múmkin.
Aıyptalýshylar barlyq taǵylǵan aıyptardy joqqa shyǵaryp, olardy qoldan jasalǵan ári saıası astary bar dep atady. PTI partııasy sot úkimin qatań synǵa alyp, ony «konstıtýsııaǵa qaıshy», «zańsyz» jáne «saıası kek alýdyń eń soraqy kórinisi» dep baǵalady.
73 jastaǵy Imran Han 2018 jyldan 2022 jylǵa deıin Pákistannyń premer-mınıstri qyzmetin atqarǵan.
