Foto: egemen.kz/ Erlan Omar
«О́nerkásip mınıstrligine kelesi jyldyń qańtar aıynan bastap óńdeý ónerkásibinde óndiristik qýatty jańǵyrtý úshin lızıngtik qarjylandyrýdy iske qosýdy tapsyramyn. Mıkro jáne shaǵyn bıznes ókilderi qosymsha kepildiksiz 300 mıllıon teńgege deıin óz óndiristerin jańǵyrtý múmkindigine ıe bolady. О́ndiristi qaıta jabdyqtaý kásiporyndardyń ónimdiligin ulǵaıtyp, básekege qabilettiligin arttyrýǵa yqpal etedi», dedi Oljas Bektenov.
Úkimet Ulttyq bankpen birlesip, shaǵyn bıznes úshin salyq eseptiligin avtomatty túrde toltyrýdy qamtamasyz etedi.
Oljas Bektenov osy baǵytta tıisti túsindirý jumystaryn júrgize otyryp, salyqtyq ákimshilendirýdiń servıstik modelin engizýdiń mańyzdylyǵyna toqtaldy.
«Bıznesti ońaılatylǵan deklarasııa rejımin qoldanatyn jetkizýshilermen jumys kezinde shyǵystardy shegerýge tyıym salý máselesi alańdatyp otyr. Bul shamamen 400 myń shaǵyn jáne mıkrobıznes ókiliniń múddesine qatysy bar. Atalǵan sanattaǵy kásipkerler óz kásibiniń bolashaǵyna alańdamaýy tıis. Qarjy mınıstrligi salyqtyq ákimshilendirýdiń servıstik modelin engizip, tıisti túsindirý jumystaryn júrgizý arqyly olardy qoldap otyrýy qajet. Sonymen qatar Ulttyq bankpen birlesip, shaǵyn bıznes úshin salyq eseptiligin avtomatty túrde toltyrýdy jedel túrde qamtamasyz etsin», dedi Oljas Bektenov.
Eske salaıyq, búgin Premer-mınıstr Oljas Bektenovtiń tóraǵalyǵymen ótken Úkimet otyrysynda «Isker aımaq» shaǵyn bıznesti qoldaýdyń biryńǵaı baǵdarlamasy qaraldy. Baǵdarlama óńirlerde, ásirese aýyldyq jerlerde jáne shaǵyn qalalarda bıznes qajettilikterin der kezinde óteýge baǵyttalǵan.
Elimizde kásipkerlerge arnalǵan «Halyq býhgalteri» aksııasy bastalady.
