Foto: ashyq derekkóz
Saqtandyrylmaǵandar arasynda «Otbasylyq sıfrlyq kartanyń» shuǵyl sanattaryna engen (D jáne E) azamattar da bar. Iаǵnı, tabysy tómengi kúnkóris shegine jetpeıtin, 95 myń muqtaj turǵyn úshin medısınalyq kómek qoljetimsiz bolǵandyqtan, keler jyldan bastap olar avtomatty túrde MÁMS júıesine qosylady.
«Saraptama jasalyp, sonyń ishinde medısınalyq kómekke kóbirek júgingen turǵyndar iriktep alyndy. Boljam boıynsha, 2026 jyly D, E sanatyndaǵy 34 myńǵa jýyq adam men resmı jumyssyz retinde tirkelgen 28 myń azamat úshin jergilikti bıýdjet esebinen jarna tólenýi tıis», deıdi Ilııas Muhamedjan.
Sonymen qatar, 2026 jyldan bastap 11 túrli áleýmettik mańyzy bar aýrýǵa shaldyqqan azamattar dárigerge tegin qaralyp, saqtandyrý statýsyna qaramastan tolyq emdele alady. Olardyń qatarynda týberkýlez, AITV, qaterli isik túrleri, sozylmaly vırýstyq gepatıt pen baýyr sırrozy, psıhıkalyq jáne minez-qulyq júıesindegi aýytqýlar, orfandy, ıaǵnı, sırek kezdesetin aýrýlar, júıke júıesiniń degeneratıvti aýrýlary, ortalyq júıke júıesi keselderi, epılepsııa, jedel ınfarkt mıokarda (bastapqy 6 aı), ınsýlt (bir jyl ishinde) bar.
«Bir sózben aıtqanda, áleýmettik mańyzy bar aýrýlarǵa shaldyqqan naýqastar qajetti tekserýlerden aqysyz ótip, analızderdi de tegin tapsyra alady. Ol úshin saqtandyrý statýsy qajet emes. Mysaly qazir, tolyq dıagnostıkadan osy aýrýlardyń ishinde tek AITV men týberkýlezge shaldyqqandar ǵana óte alady. 2026 jyldan bastap MÁMS paketi 24 túrli sozylmaly aýrýlarmen tolyǵady. Jalpy, bul ózgerister áleýmettik mańyzy bar aýrýlardyń aldyn alýǵa, dıagnostıka jasaýǵa jáne emdeýge baǵyttalǵan. Al, medısınalyq saqtandyrý júıesinde baǵasy qymbat qyzmetter men josparly medısınalyq kómekke basymdyq beriledi», dedi Densaýlyq saqtaý basqarmasy basshysynyń orynbasary Láıla Imanǵalıeva.
Sondaı-aq zańda saqtandyrylǵan turǵyndardy qoldaý sharalary da qarastyrylǵan. Budan bylaı, saqtandyrý jarnasyn keminde 5 jyl qatarynan úzbeı tólep kele jatqan, biraq belgili sebeptermen tólem jasaı almaı qalǵan turǵyndardyń saqtandyrý statýsy 6 aıǵa deıin saqtalady. Bul ásirese, jumystan shyǵyp qalǵan nemese jumys ornyn aýystyrǵan jaldamaly jumyskerlerde jıi kezdesetin jaǵdaı.
