Olardyń birqatary Almaty oblysynyń ákimi taǵaıyndaǵan «Han Táńiri», «Samǵaý» jáne «Zańǵar» syılyǵynyń jeńimpazdary atanyp, mereıleri ústem boldy.
Marapattaý rásiminde oblys turǵyndarynyń kásibı jetistikteri, áleýmettik-ekonomıkalyq damýǵa qosqan úlesi jáne adam kapıtalynyń ósýine yqpal etken eńbekteri erekshe ataldy.
«Búgin osy zalda oblysymyzdyń damýyna úles qosyp júrgen ártúrli salanyń adamdary jınaldy. Sportshylar jeńisteri arqyly oblystyń bedelin arttyrady, jýrnalıster qoǵam men bılik arasyndaǵy ashyq ári adal dıalogty qamtamasyz etedi, al jastar jańa bastamalar men sheshimderdi usynýǵa talpynady. Sondyqtan «Han Táńiri», «Samǵaý» jáne «Zańǵar» syılyǵy – kásibılik pen tabandylyqqa berilgen qurmettiń belgisi. Atalǵan salalarda eńbek etip, ter tógip júrgen azamattardyń árqaısysynyń eńbegin baǵalaımyz jáne aldaǵy ýaqytta da qoldaý kórsetemiz», dedi Almaty oblysynyń ákimi Marat Sultanǵazıev.
Sport salasynda «Han Táńiri» premııasy dástúrli túrde joǵary jetistikter men sportshylarǵa qoldaý kórsetken bapkerler men mamandardyń eńbegin moıyndaý ári qoldaý retinde tabystalady. Jyl qorytyndysynda 152 sportshy qarjylaı syılyqpen marapattaldy.
«Dene shynyqtyrý jáne sport salasy memlekettik saıasattyń turaqty nazarynda. Qazaqstan Respýblıkasynyń Prezıdenti Qasym-Jomart Kemeluly Toqaevtyń tapsyrmalary aıasynda óńirde joǵary deńgeıdegi sportshylardy daıarlaýǵa da, bolashaq chempıondardy tárbıeleýge de júıeli jaǵdaı jasalýda. Osy jyl Almaty oblysynyń tarıhyna iri halyqaralyq jeńister, aýqymdy jobalar men sport salasynyń júıeli nyǵaıý kezeńi retinde nyq endi. О́ńir sportshylary álem chempıonattarynda, sýrdolımpıada oıyndarynda jáne bedeldi halyqaralyq týrnırlerde joǵary nátıje kórsetip, daıyndyq deńgeıiniń joǵary ekenin dáleldedi», dedi oblys ákimi.
Jyl basynan beri Almaty oblysynyń sportshylary 2140 medal jeńip aldy. Onyń ishinde 778 altyn, 628 kúmis jáne 734 qola medal bar.
Saltanatty shara barysynda boks boıynsha álem chempıonatynyń júldegeri Ertýǵan Zeınýlınov óziniń qýanyshymen bólisti.
«Boksqa 15 jylymdy arnadym. Bul tek bastamasy ǵana. Aldaǵy ýaqytta da joǵary nátıjelerge jetip, altyn medal jeńip alýdy josparlap otyrmyn. Almaty oblysynyń ákimi Marat Eleýsizulyna qoldaýy úshin alǵys aıtamyn», dedi ol.
Bul kúni «jegeni jantaq, arqalaǵany altyn» deıtin jýrnalıster qaýymyna da erekshe kóńil bólindi. Úsh jyldan soń úzilgen jibi qaıta jalǵanyp, sala mamandaryna úkili úmit syılaǵan oblys ákiminiń «Samǵaý» medıa-syılyǵynyń jeńimpazdary marapattaldy. Aımaqtaǵy BAQ rólin qoldaýdyń mańyzdy belgisi bolǵan bul báıgege baspa, elektrondy BAQ, telearna, sıfrlyq platformalar men blogerler qatysty.
Laýreattar qatarynda «О́lke tynysy» JShS-ne qarasty Almaty oblystyq «Alataý araıy», «Ognı Alataý» gazetteriniń qyzmetkerleri bar. Atap aıtsaq, qos basylymnyń qalamy júırik, oıy ushqyr jýrnalısteri Bolat Májıt, Janar Myqtybaeva «Jyldyń úzdik jýrnalısi» atandy.
«Bul marapat – komanda eńbeginiń nátıjesi. Ár materıaldyń artynda áriptesterdiń qoldaýy bar. «Ognı Alataý» gazeti maǵan oqyrman aldyndaǵy zor jaýapkershilik pen jýrnalıstıkanyń myqty mektebin qalyptastyrýǵa yqpal etti», deıdi medıa-syılyqtyń ıegeri, áriptesimiz Janar Myqtybaeva.
Sondaı-aq medıa-syılyq ıegerleri qatarynda «О́lke tynysy» JShS-niń dırektory Kádirbek Qunypııauly, «Habar-24» televızııasynyń menshikti tilshisi Ardaq Qysaev, «Kazahstanskaıa pravda» gazetiniń osy óńirdegi menshikti tilshisi Áset Qalymov, «Úzdik fototilshi» atanǵan Aslan Qajeke, «Úzdik dızaıner» nomınasııasynyń ıegeri Adına Baıbak, basqa da júırik jýrnalıstermen qatar, Alatau News saıty jáne «Jetisý» telearnasy da bar.
Al jastarǵa arnalǵan «Zańǵar» premııasy 14-ten 35 jasqa deıingi belsendi azamattardy qoldaýǵa baǵyttalǵan. Jeńimpazdarǵa dıplomdar men 500 000 teńgelik sertıfıkattar tabys etildi. «Úzdik jas jýrnalıst» atanǵan Alataunews.kz agenttiginiń tilshisi Balnur Asanova bul marapat oblys ákimi júrgizip otyrǵan jastardy qoldaý jáne kásibı áleýetin damytý saıasatynyń jemisi ekenin tilge tıek etti.
О́ńirdegi talantty sportshylar, qarymdy jýrnalıster men jas kóshbasshylardyń eńbegin baǵalaýda erekshe formatta ótken saltanatty shara sońy áýezdi ánge ulasyp, kóterińki kóńil-kúı syılady.
